Ikibazo cya Qatar: Perezida Erdogan wa Turukiya arasaba umuti wihuse

Ibihano ibihugu bine by'Abarabu byafatiye Qatar byagize ingaruka ku ngendo z'indege ziva cyangwa zijya muri Qatar Uwufise ububasha kw’isanamu Getty Images
Image caption Ibihano ibihugu bine by'Abarabu byafatiye Qatar byagize ingaruka ku ngendo z'indege ziva cyangwa zijya muri Qatar

Mu rugendo rw'iminsi ibiri yatangiye mu karere, Perezida Recep Tayyip Erdogan wa Turukiya yavuze ko nta numwe wungukira mu kuba ikibazo hagati ya Qatar n'ibihugu bituranyi gikomeje.

Bwana Erdogan azasura ibihugu bya Saudi Arabia, Kuwait na Qatar mu rwego rwo kugerageza gukemura ayo makimbirane.

Mu kwezi kwa gatandatu, ibihugu bya Saudi Arabia, United Arab Emirates, Bahrain na Misiri byacanye umubano na Qatar biyishinja gushyigikira iterabwoba no kugirana umubano n'igihugu cya Iran.

Qatar ihakana ibyo birego byo gufasha imitwe y'iterabwoba.

Ikomanyirizwa ryashyizweho n'ibyo bihugu bine ryatumye Qatar igomba gutumiza ibiribwa hanze ikoresheje inzira yo mu nyanja no mu kirere kugira ngo ibashe guha iby'ibanze nkenerwa abaturage bayo bangana na miliyoni 2 n'ibihumbi 700.

Mbere yo guhaguruka ku kibuga cy'indege cya Istanbul, Bwana Erdogan yabwiye abanyamakuru ati: "Nta n'umwe ukiri kungukira mu gukomeza kw'iki kibazo".

Ibiro ntaramakuru AFP byatangaje ko yashinje "abanzi" atasobanuye, kugerageza "gukongeza amakimbirane mu bavandimwe".

Uwufise ububasha kw’isanamu AFP
Image caption Perezida Erdogan (iburyo) yagiranye ibiganiro na Minisitiri w'ububanyi n'amahanga wa Qatar, Sheikh Mohammed bin Abdul Rahman al-Thani, mu kwezi gushize

Turukiya ifite inkambi ya gisirikari muri Qatar kandi ifata Qatar nk'inshuti y'ingenzi muri aka karere.

Ibihugu byombi bifata cyo kimwe Iran - idacana uwaka na Saudi Arabia muri aka karere - biyemera nk'igihugu gifite uruhare runini mu Burasirazuba bwo hagati, ndetse binagerageza kugirana imibanire myiza nayo.

Ariko abanyamakuru baravuga ko Bwana Erdogan ashishikajwe no kutarakaza Saudi Arabia.

Yise ubwami bwa Saudi Arabia "umutegetsi usheshe akanguhe" muri aka karere k'ikigobe cy'ibihugu by'Abarabu ndetse avuga ko Saudi Arabia ifite "uruhare runini" mu kurangiza aya makimbirane.

Bwana Erdogan aravuga ko ashyigikiye ibikorwa by'ubuhuza biri gukorwa n'umutegetsi wa Kuwait, Emir Sheikh Sabah al-Ahmed al-Jaber al-Sabah.