BBC irasabwa "gukemura ubusumbane bw'imishahara"

Bamwe mu banyamakuru bashyize umukono kuri iyo baruwa: Emily Maitlis, Victoria Derbyshire, Sue Barker, Alex Jones, Fiona Bruce na Clare Balding (uhereye hejuru ibumoso uzenguruka nkuko urushinge rw'isaha rugenda)
Image caption Bamwe mu banyamakuru bashyize umukono kuri iyo baruwa: Emily Maitlis, Victoria Derbyshire, Sue Barker, Alex Jones, Fiona Bruce na Clare Balding (uhereye hejuru ibumoso uzenguruka nkuko urushinge rw'isaha rugenda)

Abanyamakuru b'ibyamamare b'abagore barasaba BBC "gukemura ubusumbane bw'imishahara" hagati yabo na bagenzi babo b'abagabo bakora akazi kamwe muri BBC.

Clare Balding, Victoria Derbyshire na Emily Maitlis ni bamwe mu bandikiye umuyobozi mukuru wa BBC, Tony Hall.

Baramusaba "gukosora" ikinyuranyo kigaragara mu mishahara hagati y'abagabo n'abagore, bavuga ko kimaze "imyaka" kizwi.

Umuvugizi wa BBC yavuze ko hari intambwe yamaze guterwa, ariko ko hakiri byinshi "bicyeneye gukorwa".

Ku wa gatatu, BBC yatangaje imishahara y'abanyamakuru bayo b'ibyamamare bahembwa arenga ibihumbi 150 by'amapawundi.

Iyo mishahara, yatangajwe muri raporo y'umwaka ya BBC, yagaragaje ko bibiri bya gatatu by'abanyamakuru bahembwa arenga ibihumbi 150 by'amapawundi ari abagabo.

Barangajwe imbere na DJ Chris Evans wo kuri Radio 2, uhembwa hagati ya miliyoni 2.2 na miliyoni 2.25 z'amapawundi.

Claudia Winkleman - izina rye ritagaragaraga ku rutonde rwa mbere rw'abashyize umukono kuri iyo baruwa - ni we munyamakuru w'umugore uhembwa menshi cyane ugereranyije na bagenzi be b'abagore.

Yinjije abarirwa hagati y'ibihumbi 450 n'ibihumbi 500 by'amapawundi umwaka ushize.

Uwufise ububasha kw’isanamu PA/Getty Images
Image caption Evans na Winkleman ni bo bahembwa menshi kurusha abandi mu bagabo n'abagore muri BBC

Ni ibaruwa yashyizweho umukono n'abarenga 40.

Bavuga ko raporo ijyanye n'imishahara yagaragaje "ibyo benshi muri twe tumaze imyaka myinshi ducyeka...ko abagore muri BBC bahembwa macye ugereranyije n'abagabo bakora akazi kamwe".

Abashyize umukono kuri iyi baruwa bavuga ko nubwo umuyobozi mukuru wa BBC yasezeranyije ko azakemura icyo kibazo bitarenze umwaka wa 2020, bo bamusaba kugicyemura "ubu ngubu".