Umukwe wa Trump arahakana kugambana n'Uburusiya

Bwana Kushner araza kwitaba sena y'Amerika kuri uyu wa mbere ndetse azitaba n'inteko nshingamategeko ku wa kabiri Uwufise ububasha kw’isanamu Reuters
Image caption Bwana Kushner araza kwitaba sena y'Amerika kuri uyu wa mbere ndetse azitaba n'inteko nshingamategeko ku wa kabiri

Jared Kushner, umukwe wa Perezida Donald Trump, araza kubwira sena y'Amerika ko yaba we cyangwa undi wese mu bari bashinzwe ibikorwa byo kwamamaza Bwana Trump nta wagambanye n'Uburusiya.

Araza kuvuga ko nta migenderanire itaboneye yagiranye n'Uburusiya kandi ko nta nkunga y'Uburusiya yahawe mu bikorwa bye by'ubucuruzi.

Mbere yuko yitaba sena, Bwana Kushner yabaye atangaje incamake y'ibyo aza kubwira abagize sena.

Abagize sena, inteko nshingamategeko n'akanama kadasanzwe, bose bari guperereza niba Uburusiya bwarivanze mu matora ya perezida w'Amerika yabaye umwaka ushize.

Bwana Kushner w'imyaka 36 y'amavuko, ni umujyanama mukuru wa Perezida Trump. Yari ayoboye itsinda ry'abamamazaga Trump mu buryo bw'ikoranabuhanga rishingiye kuri mudasobwa. Ni umugabo wa Ivanka, umukobwa wa Trump.

Bwana Kushner udakunze kwigaragaza mu bitangazamakuru, kuri uyu wa mbere araza kwitaba akanama gashinzwe ubutasi ka sena. Hanyuma ku wa kabiri azitaba akanama gashinzwe ubutasi k'inteko nshingamategeko.