Perezida Buhari wa Nigeria yabonywe i London

Perezida wa Nigeria, Muhammadu Buhari (hagati), afata ifunguro rya saa sita mu nzu ikorerwamo n'ambasade ya Nigeria i London Uwufise ububasha kw’isanamu Reuters
Image caption Perezida wa Nigeria, Muhammadu Buhari (hagati), afata ifunguro rya saa sita mu nzu ikorerwamo n'ambasade ya Nigeria i London

Nyuma y'iminsi igera kuri 80 avuye muri Nigeria, Perezida Buhari bwa mbere yafotowe ari mu murwa mukuru w'Ubwongereza, London.

Perezida Muhammadu Buhari w'imyaka 74 y'amavuko, yagiye mu Bwongereza kwivuza indwara itaratangajwe.

Itangazo ryashyizwe ahagaragara na leta ya Nigeria riravuga ko ku cyumweru, Bwana Buhari yahuye n'abayobozi ba za leta zigize Nigeria bo mu ishyaka rye.

Ukutagaragara kwe kwateye umutima uhagaze muri Nigeria, bamwe bagahwihwisa ko yaba yarapfuye.

Abandi bagize impungenge ko atashobora gukomeza imirimo ye.

Iryo tangazo rya leta ya Nigeria rivuga ko Perezida Buhari "yari yishimye cyane ndetse nta kintu na gito cyahindutse mu gutera urwenya kwe".

Rochas Okorocha, umwe mu bayobozi ba za leta zigize Nigeria bahuye na Perezida Buhari, yavuze ko muri icyo kiganiro cyamaze isaha imwe Perezida Buhari yari ashishikariye kuganira ku bijyanye na Nigeria.

Bwana Buhari yavuye muri Nigeria ku itariki ya 7 y'ukwezi kwa gatanu. Ni urugendo rwa kabiri agiriye mu Bwongereza kwivuza uyu mwaka.

Muri iki gihe atari muri Nigeria, Visi Perezida Yemi Osinbajo ni we yabaye ahaye ububasha bwose bw'umukuru w'igihugu.