Igitero cy'i Barcelona: Umugabo warashwe agapfa ni uwacyekwaga

Uwabibonye wari hafi y'ahacururizwa lisansi ni we warabuye polisi Uwufise ububasha kw’isanamu AFP
Image caption Uwabibonye wari hafi y'ahacururizwa lisansi ni we warabuye polisi

Igipolisi cyemeje ko umugabo cyarashe agapfa wasaga n'uwambaye umukandara w'ibiturika mu gace k'uburengerazuba bwa Barcelona ari Younes Abouyaaqoub.

Ni we ucyekwa kuba uw'ibanze mu gitero cyo ku wa kane ushize muri uwo mujyi.

Iryo rasa bivugwa ko ryabereye ku muhanda mu gace ka Subirats.

Uwufise ububasha kw’isanamu Catalan police/El Pais
Image caption Bivugwa ko Younes Abouyaaqoub afite inkomoko mu gihugu cya Maroc

Mbere yaho, igipolisi cyari cyemeje ko kiri guhiga Younes Abouyaaqoub w'imyaka 22 y'amavuko, ucyekwaho kuba yari atwaye imodoka akayiyobora mu bantu babarirwa mu macumi ku muhanda wa Las Ramblas i Barcelona.

Amakuru asubira mu byavuzwe n'igipolisi yavuze ko uwo mugabo warashwe mu gace ka Subirats yavugiye hejuru ngo "Allahu Akbar" ("Imana ni nkuru"), igihe yarasumbirijwe.

Ibyo byabereye ku birometero 40 uvuye i Barcelona, ahabereye igitero cyo ku wa kane ushize ku muhanda wa Las Ramblas cyahitanye abantu 13.

Umutwe w'iterabwoba wiyita leta ya kisilamu wavuze ko uri inyuma y'ibitero byagabwe ku muhanda wa Las Ramblas i Barcelona ndetse no mu mujyi wa Cambrils.

Ariko ntibyahise bigaragara neza niba abagabye ibyo bitero barakoranaga n'uwo mutwe cyangwa hari uburyo bagenderaga ku mahame yawo.