Nigeria: Ubwiyongere bw'abana "bakoreshwa mu guturitsa ibisasu"

Boko Haram yayogoje ubuzima bw'abantu benshi mu majyaruguru y'uburasirazuba bwa Nigeria Uwufise ububasha kw’isanamu AFP
Image caption Boko Haram yayogoje ubuzima bw'abantu benshi mu majyaruguru y'uburasirazuba bwa Nigeria

Umuryango w'abibumbye uravuga ko umubare w'abana bakoreshwa mu guturitsa ibisasu n'umutwe w'iterabwoba wa Boko Haram mu majyaruguru y'uburasirazuba bwa Nigeria, wiyongereye cyane.

Ishyirahamwe ry'umuryango w'abibumbye ryita ku bana, Unicef, rivuga ko kugeza ubu muri uyu mwaka abana 83 biturikirijeho ibisasu - uwo mubare ukaba ngo warikubye inshuro enye ugereranyije n'umwaka wose ushize.

55 muri bo bari abakobwa bafite mu nsi y'imyaka 15 y'amavuko. Ngo hari nubwo igisasu cyari gishumitse ku mwana wari uhetswe mu mugongo n'umwana w'umukobwa.

Unicef ivuga ko ubu buryo ari ubunyamaswa butera ubwoba n'urwicyekwe no ku bana barekuwe na Boko Haram.

Nkuko Unicef ibivuga, kuva mu mwaka wa 2014 abana 127 bakoreshejwe mu guturitsa ibisasu mu majyaruguru y'uburasirazuba bwa Nigeria.

Umutwe w'iterabwoba wa Boko Haram usanzwe ukoresha abana mu ntambara yawo, ukaba waranyuruje abakobwa b'abanyeshuri babarirwa mu magana, ndetse ukoresha ingufu mu gushyira abana b'abahungu mu gisirikare.