Misiri yanenze icyemezo cy'Amerika cyo gufatira inkunga

Nta mpamvu yatanzwe ku kuba inama yari iteganyijwe hagati ya Sameh Shoukry na Jared Kushner itakibaye Uwufise ububasha kw’isanamu AFP
Image caption Nta mpamvu yatanzwe ku kuba inama yari iteganyijwe hagati ya Sameh Shoukry na Jared Kushner itakibaye

Misiri yanenze Leta Zunze Ubumwe z'Amerika nyuma yaho bivugwa ko zafatiriye inkunga mu bya gisirikare ifite agaciro ka miliyoni 195 z'amadolari ndetse zigahagarika n'indi nkunga ingana na miliyoni 96 z'amadolari.

Amerika ivuga ko yafashe icyo cyemezo kubera impungenge ku iyubahirizwa ry'uburenganzira bwa muntu mu gihugu cya Misiri.

Itangazo rya minisiteri y'ububanyi n'amahanga ya Misiri rivuga ko icyemezo cy'Amerika, kitaratangazwa ku mugaragaro, kigaragaza "kudashyira mu gaciro".

Sameh Shoukry, Minisitiri w'ububanyi n'amahanga wa Misiri, yasubitse inama yari kugirana na Jared Kushner, umukwe wa Perezida Donald Trump w'Amerika.

Abategetsi b'Amerika bavuze ko batishimiye ko Perezida wa Misiri aherutse gushyira umukono ku itegeko rishya rigenga imiryango itegamiye kuri leta.

Iryo tegeko rivuga ko imiryango itegamiye kuri leta ibujijwe gukora ibikorwa "bibangamira umutekano w'igihugu, umudendezo w'abaturage, imigenzo iboneye y'abaturage cyangwa ubuzima bw'abaturage".

Iryo tegeko kandi rigenzurira bya hafi abatera inkunga iyo miryango itegamiye kuri leta, ndetse rigaha leta ububasha bwo kugenzura ibikorwa by'iyo miryango itegamiye kuri leta.