Ubuhinde: Urukiko rw'ikirenga rwategetse ko ubuzima bwite ari ntavogerwa

Iki cyemezo cy'urukiko rw'ikirenga gishobora kugira ingaruka kuri gahunda ya leta yo kwibaruza izwi nka Aadhaar Uwufise ububasha kw’isanamu AFP
Image caption Iki cyemezo cy'urukiko rw'ikirenga gishobora kugira ingaruka kuri gahunda ya leta yo kwibaruza izwi nka Aadhaar

Urukiko rw'ikirenga mu Buhinde rwategetse ko ubuzima bwite bw'umuntu ari ntavogerwa, icyemezo gishobora kugira ingaruka kuri gahunda ya leta yo kubarura nimero za konti za banki n'uburyo bwo kuriha imisoro.

Abacamanza bavuze ko uburenganzira ku buzima bwite ari "izingiro ry'ingingo ya 21 irinda ubuzima n'ubwigenge".

Imiryango irengera uburenganzira bwa muntu ifite impungenge ko amakuru y'ubuzima bwite ashobora gukoreshwa nabi.

Abategetsi bo bashaka ko kwibaruza - muri ubwo buryo bwo gutanga amakuru bwite y'umuntu ajyanye na nimero za konti za banki n'uburyo bwo kuriha imisoro - biba itegeko.

Iki cyemezo cy'urukiko rw'ikirenga kiburijemo ibyemezo bibiri by'urukiko rw'ikirenga byabanje, byavugaga ko ubuzima bwite bw'umuntu atari uburenganzira bw'ibanze.

Inteko y'urukiko rw'ikirenga yari igizwe n'abacamanza 9. Byari bicyenewe ko baba ari abacamanza 9 kuko ibyemezo byafashwe mbere, mu mwaka wa 1954, byafashwe n'inteko igizwe n'abacamanza 8.