Afurika y'epfo: Abazungu binjije umwirabura mu isanduku bahamijwe icyaha

Willem Oosthuizen na Theo Martins Jackson bahakana ibyo baregwa Uwufise ububasha kw’isanamu Reuters
Image caption Willem Oosthuizen na Theo Martins Jackson bahakana ibyo baregwa

Abazungu babiri b'abahinzi binjije umugabo w'umwirabura mu isanduku ku gahato bahamijwe icyaha cyo kunyuruza no kugerageza kwica.

Mu kwezi kwa munani k'umwaka ushize wa 2016, Victor Mlotshwa w'imyaka 27 y'amavuko, yarakubiswe ndetse yinjizwa mu isanduku ku gahato n'abazungu babiri b'abahinzi, Theo Martins Jackson na Willem Oosthuizen.

Bombi bazakatirwa ku itariki 23 z'ukwezi kwa 10. Bahakanye ibyo baregwa.

Uru rubanza rwateje uburakari muri Afurika y'epfo, runagaragaza ubushyamirane bushingiye ku moko burangwa mu bahinzi batuye mu mujyi.

Bwana Mlotshwa yatanze ikirego hashize amezi ibyo bibaye, ari uko hasohotse videwo ku rubuga rwa YouTube igaragaza ibyabaye.

Uwufise ububasha kw’isanamu YouTube
Image caption Amashusho ya videwo y'uko gukubitwa yagiye ahagaragara umwaka ushize

Mu nyandiko bashyikirije urukiko ikubiyemo ubwiregure bwabo, Jackson na Oosthuizen bavuze ko batari bagambiriye kugirira nabi Bwana Mlotshwa. Ngo bashakaga gusa "kumuha isomo".

Bavuze ko Bwana Mlotshwa yari amaze igihe abanyurira mu murima.

We yarabihakanye, avuga ko yari aciye inzira ya bugufi agiye ku maduka aho nyina yari amutumye.

Bivugwa ko abo bari bibasiye Bwana Mlotshwa bamuteraga ubwoba ko bamusukaho lisansi bakamutwika ari muzima.

Kuri uyu wa gatanu nibwo umucamanza Segopotje Mphahlele wo mu rukiko rwa Middelburg Magistrates Court yasomye umwanzuro uhamya icyaha abo bagabo bombi.

Abashyigikiye Bwana Mlotshwa bahise barangurura amajwi baririmba indirimbo z'ibyishimo.

Bwana Mlotshwa yabwiye BBC ati: "Ndiruhukije kubona ubutabera bwakurikijwe".

Ku mpamvu z'umutekano, umushinjacyaha yasabye urukiko kuburizamo ugufungurwa by'agateganyo abo bagabo bombi bari barahawe.

Uwufise ububasha kw’isanamu MUJAHID SAFODIEN
Image caption Victor Mlotshwa yaranyurujwe aranakubitwa igihe yari mu nzira ataha