Perezida Trump yahaye imbabazi umupolisi wateye impagarara Joe Arpaio

Joe Arpaio ari kumwe na Donald Trump mu gihe cy'ibikorwa bye byo kwiyamamaza Uwufise ububasha kw’isanamu Reuters
Image caption Joe Arpaio ari kumwe na Donald Trump mu gihe cy'ibikorwa bye byo kwiyamamaza

Perezida wa Amerika Donald Trump yahaye imbabazi uwahoze ari umuyobozi wa polisi muri leta ya Arizona wahamwe n'icyaha cy'agasuzuguro.

Bwana Joe Arpaio, w'imyaka 85, yagamijwe icyaha n'urukiko nyuma yo gusuzugura umwanzuro warwo wamutegekaga guhagarika ibikorwa byo kwibasira abashoferi b'abimukira.

Byari byitezwe ko agomba gukatirwa igihano mu kwezi kwa Cumi. Ariko perezida Trump yari yaciye amarenga ko ashobora kumugirira imbabazi igihe yajyaga mu mujyi wa Phoenix ku wa Kabiri.

Bwana Arpaio mu gushimira Trump yavuze ko "guhamwa n'icyaha byari bifite impamvu za politike byakozwe n'abahoze mu rwego rw'ubucamanza ku butegetsi bwa Obama".

Yagize ati: "ntaho nzajya", yirinda kwemeza cyangwa guhakana niba azongera kwiyamamariza kuyobora polisi bita sheriff.

Bwana Trump yamye ashimagiza uyu mugabo wateje impagarara cyane kubera ubukana bwe ku kibazo cy'abimukira.

Mu gihe cyo kwiyamamaza muri 2016, Bwana Arpaio yagaragaye ari kumwe na Trump amwita umukandida "w'amategeko n'umurongo ugororotse".

Uwufise ububasha kw’isanamu Reuters

Mu itangazo ryasohowe risobanura immabazi, Bwana Trump yagize ati:

"Ubuzima n'umwuga bya Arpaio watangiye ku myaka 18 igihe yiyandikishaga mu gisirikare nyuma y'intambara ya Koreya byerekana urugero rw'ubwitange bwo gukorera rubanda. Mu gihe cy'akazi ke nk'umuyobozi wa polisi, Arpaio yamye arinda rubanda ibyaha ndetse n'abimukira batemewe n'amategeko."

Mu kwezi kwa Karindwi 2017, yahamijwe icyaha cyo kurenga ku ibwirizwa ryo muri 2011 igihe yabuzwaga gufunga abimukira.