Houston: Ibigega bibiri by'amazi byatangiye kurengerwa

Amafoto afatiwe mu kirere arerekana uburyo ibikorwa-remezo birimo inyubako ndende byahazahariye Uwufise ububasha kw’isanamu Reuters
Image caption Amafoto afatiwe mu kirere arerekana uburyo ibikorwa-remezo birimo inyubako ndende byahazahariye

Umutegetsi muri leta ya Texas aravuga ko ibigega bibiri by'amazi biri hanze y'umujyi wa Houston byatangiye kurengerwa nyuma yaho umuyaga ukaze uvanze n'imvura wa Harvey utumye ububiko bw'amazi yabyo busendera.

Ni ibigega bizwi nka Addicks na Barker.

Abahanga mu bwubatsi bari bagerageje gutuma abaturiye Houston nabo batarengerwa, barekura amwe mu mazi y'ibyo bigega.

Ariko Jeff Lindner, umutegetsi ushinzwe ibikorwa byo guhangana n'imyuzure, aravuga ko ubu amazi yatangiye gusendera akarenga ubushobozi by'ibyo bigega.

Umuyaga ukaze uvanze n'imvura uzwi nka Harvey wateje imyuzure ikomeye muri leta ya Texas, none ubu yatangiye no kwadukira leta ya Louisiana.

Uwufise ububasha kw’isanamu AFP
Image caption Imodoka nyinshi zarengewe mu mujyi wa Houston, aho hamwe na hamwe ba nyirazo bazivanwamo n'abashinzwe ibikorwa by'ubutabazi

Imvura nyinshi cyane itarigeze igwa kuri iki kigero mbere muri Leta Zunze Ubumwe z'Amerika, yatumye abantu babarirwa mu bihumbi bata ingo zabo. Biravugwa ko abantu 9 bapfuye mu gace k'umujyi wa Houston.

Byitezwe ko kurengerwa kw'ibigega bya Barker na Addicks byongera amazi mu mugezi wa Buffalo Bayou.

Ni wo mugezi munini mu mujyi wa Houston, wa kane mu bunini mu mijyi igize Leta Zunze Ubumwe z'Amerika.

Perezida Donald Trump w'Amerika yerecyeje muri leta ya Texas kugira ngo yirebere ubwe akaga katewe n'umuyaga ukaze uvanze n'imvura wa Harvey.

Uwufise ububasha kw’isanamu Reuters
Image caption Perezida Donald Trump na Madamu we Melania Trump bageze i Texas kuri uyu wa kabiri bahita berekeza aho baherewe amakuru ajyanye n'umuyaga ukaze uvanze n'imvura wa Harvey

Imvura ikomeje kugwa.

Mu mujyi wa Houston, amakuru y'iteganyagihe aravuga ko kuri uyu wa kabiri mu duce tumwe na tumwe tw'uwo mujyi hashobora kugwa imvura nyinshi cyane, kuburyo imyuzure yayo ishobora kugera ku kigero cyo mu mavi h'umuntu mukuru.