Myanmar: Ababarirwa mu bihumbi bahungiye muri Bangladesh

Aba Rohingya babarirwa mu bihumbi, biganjemo abagore n'abana, bamaze guhungira muri Bangladesh guhera ku wa gatanu Uwufise ububasha kw’isanamu Reuters
Image caption Aba Rohingya babarirwa mu bihumbi, biganjemo abagore n'abana, bamaze guhungira muri Bangladesh guhera ku wa gatanu

Abakozi b'imiryango ifasha baravuga ko abayisilamu barenga ibihumbi 18 bo mu bwoko bw'aba Rohingya muri leta ya Rakhine mu gihugu cya Myanmar bamaze guhungira muri Bangladesh mu gihe kitageze ku cyumweru.

Amakuba yadutse ku wa gatanu ubwo intagondwa z'aba Rohingya zagabaga igitero ku biro bya polisi 30, bigatuma igisirikari kitabazwa.

Abakozi b'imiryango itanga imfashanyo bari gukora ibikorwa by'ubutabazi batanga aho kurara ndetse n'ibyo kurya, baravuga ko abarenga 10 mu bantu bashya bamaze kugera muri Bangladesh bafite ibikomere by'amasasu.

Amakuru aravuga ko abandi bantu babarirwa mu bihumbi bagitegerereje ku mupaka bashaka kwinjira muri Bangladesh.

Biravugwa ko abandi benshi nabo bari mu gihirahiro ahantu hadatuwe hagati y'ibihugu byombi.

Amakuru aravuga ko abantu 100, biganjemo intagondwa, bishwe mu bikorwa by'urugomo biheruka muri leta ya Rakhine.

Bisa nk'ibidashoboka kubona amakuru y'uruhande rudafite aho rubogamiye muri iyo leta kuko abanyamakuru bacye ni bo bemererwa kuhagera.