Ingabire yangiwe kuburana ari hanze

Victoire Ingabire
Image caption Ingabire yavuze ko ubucamanza bwo mu Rwanda butigenga.

Urukiko rwisumbuye rwa Gasabo rwemeje ko Madame Victoire Ingabire akomeza gukurikiranwa ari mu buroko mu gihe cy'iminsi 30 ategereje ko urubanza rwe rutangira kuburanishwa mu mizi.

Urukiko rwavuze ko hari ibimenyetso bihagije byatanzwe n’ubushinjacyaha bituma uyu munyapolitiki atemererwa kuburana ari hanze .

Iki cyemezo kandi kireba na Major Vital Uwumuremyi ,urukiko rwavuze ko nawe agomba kuguma mu munyururu kugira ngo adatoroka igihugu.

Asobanura impamvu z’icyemezo cy’urukiko, umucamanza yavuze ko ubushinjacyaha bwerekanye ibimenyetso by’uko ibyaha Ingabire ashinjwa bikomeye bityo bugatinya ko ashobora gucika ubutabera cyangwa akaba yasibanganya ibimenyetso.

Umucamanza avuga kandi ko Ingabire Victoire yakomeje kongera ibyaha mu gihe ubutabera bwamwemereraga kuburana ari hanze mu kwezi kwa kane .

Ibi byemezwa na Major Vital uwumuremyi uvuga ko yakomeje gukorana na Ingabire kugeza igihe yatabwaga muri yombi agerageza kwambuka umupaka wa Congo.

Mbere yo gusohoka mu rukiko Madame Ingabire yabaye nk’utavuga rumwe n’umucanza ubwo yazamuraga ijwi avuga ko ubutabera bwo mu Rwanda butigenga, ko impamvu akurikiranwa ari iza politiki .

Gusa umunyamategeko Gatera Gashabana umwunganira we yavuze ko agifite icyizere mu mategeko y’U Rwanda cyakora ntiyahisha ko ababajwe n’umwanzuro w’umucamanza.

Ku wa mbere nibwo Victoire Ingabire yagejejwe imbere y'urukiko rwisumbuye rwa Gasabo aho yarezwe ibyaha byo gukorana n'umutwe w'iterabwoba ugamije guhungabanya umutekano w'igihugu- Coalition of Democratic Forces.

Ingabire yahakanye ibyaha aregwa avuga ko ibirego aregwa ari ibihimbano bishingiye kuri politiki ariko uwo baregwana, Major Vital Uwumuremyi, yemeye ibyo aregwa abisabira n'imbabazi.