Jordaan ariyamamaza mu matora ya FIFA

Danny Jordaan
Image caption Danny Jordaan aravuga ko Afurika imufitiye icyizere.

Danny Jordaan arashaka intebe mu kanama k'ubuyobozi nshingwabikorwa bw'ishyirahamwe ry'umupira w'amaguru (FIFA).

Akanama nshingwabikorwa ka FIFA niko gahitamo aho imikino y'igikombe cy'isi ikinirwa.

Uyu mugabo yari umukuru w'akanama kari gashinzwe imikino y'igikombe k'isi cy'umupira w'amaguru yabereye muri Afurika yepfo muri uno mwaka.

Danny Jordaan ukomoka muri Afurika y'epfo afite imyaka 59 y'amavuko akaba yatoranijwe n'igihugu cye kuzahatana mu matora y'uwo mwanya ateganijwe umwaka utaha.

Bwana Jordan ubu witeguye gutangira gushakisha amajwi hirya no hino ku mugabane w'africa mu mezi make ari imbere yavuze ko kuba yarigeze gukora mu byerekeye itegurwa ry'imikino y'igikombe cy'isi bizamufasha.

Yanavuze kandi ko kuba Africa imufitiye icyizere kuri uwo mwanya ari ingirakamaro. Amatora ku myanya ibiri muri ine igenerwa umugabane w'Africa mu kanama ubuyobozi nshingwabikorwa bw'ishyirahamwe mpuzamahanga ry'umupira w'amamaguru ateganijwe mu kwezi kwa kabiri K'umwaka utaha.

Umwe muri iyo myanya ifitwe n'umunya Nigeria Amos Adamu wigeze guhagarikwa na ririya shyirahamwe by'agateganyo akaba ategereje igisubizo ku birego bya ruswa yari akurikiranyweho n'iperereza.

Undi munyafrica nawe ureberwa kuri uwo mwanya ni Jacques Anouma uyobora ishyirahamwe ry'umupira w'amaguru muri Cote d'Ivoire. Ntaravuga ku mugaragaro niba azongera guhatana mu matora ngo abashe kuguma ku mwanya we muri kariya kanama mu gihe cy'indi myaka ine.

Uburambe mu kazi

Ariko birakekwa ko azageregeza kuguma ku mwanya we mu gihe azaba atirukanywe n'akanama ka FIFA kagomba gufata icyemezo muri uku kwezi ku byerekeye imikorere ye. Taliki ya 23 Ugushyingo niwo munsi ntarengwa wo kurobanura abagomba guhiganwa mu matora. Ubwo hazaba hasigaye amezi atatu ngo ihuriro ry'amashyirahamwe nyafrica y'umupira w'amaguru riteranire I Khartoum muri Sudan.

Jordaan abaye uwambere utangaje ku mugaragaro ku ateganya kwiyamamariza uyu mwanya. Afite uburambe bw'imyaka isaga 20 mu bijyanye n'ubuyobozi bw'umupira w'amaguru kandi kuba yarashoboye gutunganya neza imikino iheruka y'igikombe cy'isi yabereye mu gihugu cye bizamubera ingingo ikomeye yo gushingiraho yiyamamaza. Danny Jordaan yavuze ko ashyigikiwe cyane n'amashyirahamwe nyafrica y'umupira w'amaguru kandi ko afite icyizere kuzatsindira uriya mwanya mu kanama ka FIFA ndetse no mu Ishyirahamwe nyafurika ry'umupira w'amaguru (CAF).

Mu busanzwe abayobozi bifuza kuzazamuka mu buyobozi bwa FIFA bahera ku buyobozi bw' Ishyirahamwe nyafurika ry'umupira w'amaguru (CAF) ariko Jordaan arabigeragereza icyarimwe.