Erlinder yanze kujya Arusha

Peter Erlinder
Image caption Peter Erlinder

Peter Erlinder yagombaga gusubira ku rukiko rw'Arusha kuburanira Major Aloys Ntabakuze mu bujurire bwe buteganijwe mu cyumweru gitaha ariko yanze kujyayo kubera ikibazo cy'umutekano we.

Peter Erlinder yabwiye BBC ko akomeje kubona iterabwoba ryo kongera kumufata rikorwa na leta y'u Rwanda kuburyo adashobora gusubira i Arusha, ngo na burya huzuyeyo abantu bakorera leta y'u Rwanda.

Uyu munyamerika uburanira abantu avuga ko hari na mugenzi we uburanira abaregwa i Arusha wishwe umwaka ushize hashize ibyumweru 3 gusa Peter Erlinder arekuwe mu Rwanda, undi nawe afatwa n'igipolisi cya Tanzania.

Ku itariki 27 z'ukwezi kwa mbere k'uyu mwaka, urukiko rw'ubujurire rwanze ko Peter Erlinder yakunganira Major Aloys Ntabakuze hakoreshejwe ibyuma bya video link, uru rukiko rwa Arusha kandi ngo rwanze guha Peter Erlinder uburyo bwo gucungirwa umutekano.