Patrice Faye yarekuwe ajya mu Bufaransa

Patrice Faye
Image caption Patrice Faye

Umushinjacyaha mukuru wa Bujumbura yafashe icyemezo cyo kureka umufaransa Patrice Faye wari wakatiwe igifungo cy'imyaka 25 n'urukiko rw'iremezo rwa Bujumbura kujya kuvurizwa mu Bufaransa.

Uyu mufaransa yarajuriye, asaba kuburana ari hanze, maze urukiko rw'ubujurire rwa Bujumbura rufata icyemezo cyo kumurekura akaburana ari hanze.

Umucamanza w'urukiko rw'ubujurire yafashe iki cyemezo amaze kubona icyegeranyo cy'abaganga kigaragaza amagara ya Patrice Faye.

Urukiko rw'ubujurire rumaze gufata icyemezo cyo kumurekura, umushinjacyaha mukuru wa Bujumbura nawe yahise yemera ko yajya kwivuriza iwabo mu Bufaransa ariko akazajya amwitaba buri mezi abiri.

Urubanza rwe rukazakomeza kuburanishwa mu mizi mu gihe umucamanza azateganya.

Patrice Faye araregwa gufata abana b'abakobwa ku ngufu bari hagati y'imyaka 13 na 17, yatawe muri yombi mu kwezi kwa kane k'uyu mwaka w'i 2011.