Tanzania yafashe abasirikare ba Congo

Abasirikare ba Congo bafashwe na Tanzania Uwufise ububasha kw’isanamu
Image caption Abasirikare ba Congo bafashwe na Tanzania

Igisirikare cya Tanzania kiravuga ko cyafashe abasirikare bagera kuri 20 bari bitwaje intwaro za rutura, bavuye muri Repubulika Iharanira Demokarasi ya Congo.

Umuvugizi w'igisirikare cya Tanzania mu mujyi wa Kigoma, yavuze ko abo basirikare bo muri Congo binjiye mu buryo butemewe n'amategeko mu karere ka Tanzania mu kiyaga cya Tanganyika bakoresheje ubwato, bakurikiye inyeshyamba.

Ngo bari bitwaje intwaro, ibisasu bya rokete hamwe n'andi masasu menshi.

Kuwa kane w'icyumweru gishize, umutwe w'inyeshyamba z'abanyecongo zageze i Kigoma zakomeretse zishakisha aho zakwivuza.

Ariko umuvugizi w'igisirikare cya Congo mu ntara ya Kivu y'amajyepfo, Colonel Jean Marie Vianney Kazarama yabwiye BBC ko abo basirikare bafashwe bamaze amezi agera kuri 6 batorotse.

Ngo bakorana n'imitwe ya Mai Mai Yakutumba na FDLR hamwe na FNL.

Ngo bari bamaze iminsi barwana n'ingabo za leta mu karere ka Fizi maze urugamba rubashyuhanye bariruka bahungira muri Tanzania.