Syria: Inkoramutima za Assad zishwe

Inkoramutima za Prezida Assad zishwe Uwufise ububasha kw’isanamu BBC World Service
Image caption Inkoramutima za Prezida Assad zishwe

Television ya Syria yavuze ko muramu wa Prezida Assad, bwana Assef Shawkat yaguye mu gitero cyagabwe ku biro bikuru by'abashinzwe umutekano biri ku murwa mukuru wa Damascus.

Bwana Assef yarakomeye cyane mu nzego zishinzwe umutekano muri Syria.

Yapfanye kandi n'umushikiranganji w'ingabo, Daoud Rajiha, naho umukuru w'ibiro bishinzwe iperereza Hisham Ikhtiar n'umushikiranganji w'ubutegetsi bw'igihugu, Mohammad Ibrahim al-Shaar barakomereka.

Umuntu wagabye icyo gitero, yateze igisasu ahantu abo bakuru bashinzwe umutekano bagiraga inama.

Ubu ako karere ka Rawda, kabereyemo icyo gitero, harafunze. Icyo gitero cyagabwe mu gihe havaga amakuru avuga ko imirwano ikomeje gukaza umurego mu murwa mukuru wa Damascus.

Umutwe w'inyeshyamba wa Free Syrian Army wavuze ko ariwo wagabye icyo gitero.

Leta ya Syria ariko ivuga ko igiye kwivuna umwanzi, yita icyo gitero, igikorwa cy'abaterabwoba, maze ishyira mu majwi ibihugu bya Amerika na Israel kuba inyuma yabyo

I Washington , umushikiranganji w'ingabo w'Amerika, Leon Panetta hamwe n'abashikiranganji b'imibano n'amahanga b'Ubwongereza n'Ubufaransa, bavuze ko ubu bwicanyi buri guterwa n'uko Prezida Bashar Al Assad atumva ibyo amahanga amusaba. .