Rwanda: Ingabire yasubiye mu rw'ikirenga

Ibiherutse kuvugururwa: 16 ukwa kane, 2013 - 14:28 GMT
Victoire Ingabire

Urukiko rw’ikirenga mu Rwanda rwasubukuye urubanza rwa madame Ingabire Victoire, umuyobozi w’ishyaka FDU_Inkingi ritaremerwa n’amategeko. Ubushinjacyaha bwasabye urukiko guhamya Ingabire ibyaha yahanaguweho n’ururkiko rukuru gufunga birimo gushinga umutwe w’ingabo zigamije igitero cy’intambara. Bumusabira gufungwa imyaka 25 muri gereza.

Umwaka ushize Ingabire yakatiwe n’ururkiko rurkuru gufungwa imyaka umunani. Ariko Ubushinjacyaha bwajuririye iki gihano buvuga ko ari gito. I Kigali, Prudent Nsengiyumva yari mu rurkiko rw’ikirenga.

Mu gusobanura ishingiro ry’ubujurire mu rukiko rw’ikirenga, Ubushinjacyaha bwabwiye urukiko ko madamu Ingabire Victoire yohereje abasirikare bane bareganwa nawe amafaranga ayanyujije mu bantu batandukanye. Ubushinjacyaha bwavuze ko intego yayo mafaranga nta kindi yari igamije uretse kugura ibikoresho bya gisirikare no gushinga umutwe wa gisirikare.

Abashinjacyaha batatu kandi babwiye urukiko ko impapuro zakuwe mu gihugu cy’ubuholandi, zerekana ko Ingabire yari asanzwe afite umugambi wo gushyiraho igisirikare gishingiye ku ishyaka rya FDU- Inkingi ndetse ngo ari no mu nzira zo kubishyira mu bikorwa.

Uruhande rw’ubushinjacyaha rwavuze ko umucamanza w’urukiko rukuru wahaye madamu Ingabire victoire igihano cy’imyaka umunani muri gereza, yabikoze yirengagije amategeko. Bwatangaje ko bwabonye inyandiko yanditswe na Ingabire asaba imbabazi umukuru w’igihugu ariko ngo kuba atarazisabiye imbere y’urukiko ni impamvu ikomeye yerekana ko izi mbabazi zitamuvuye ku mutima kandi ko zitari mu murongo w’ibigenderwaho mu kuzitanga.

Nyuma y’ibi, madamu Ingabire wakurikiye ibisobanuro by’ubushinjacyaha yicaye ku ntebe zagenewe ababuranyi, yamwenyuye bikomeye cyane ariko atavuze. Ubushinjacyaha bwasabye urukiko rw’ikirenga kongera gusuzuma no guhamya Ingabire ibyaha bibiri yahanaguweho birimo gukwirakwiza ibihuha byangisha rubanda ubutegetsi no kurema umutwe w’ingabo ugamije igitero cy’intambwara no guhirika ubutegetsi.

Ubushinjacyaha buvuga ko Ingabire yaranzweho amagambo n’inyandiko zigaragaza icyaha cyo kwangisha abaturage ubutegetsi; avuga ko mu Rwanda hari ubutegetsi bw’u bw’ubwiru bugizwe n’agatsiko k’abatutsi baturutse muri Uganda. Ingabire kandi ashinjwa kuvuga ko ubukungu bw’igihugu buri mu maboko y’agatsiko ka bamwe kandi ko abaturage bari ku ngoyi. Ibi ngo nta kindi bigamije uretse gutuma abaturage bivumbura kuri leta yabo no gusubiranamo. Ariko umucamanza w’urukiko rukuru we, yatangaje ko kuba ibi bitarabaye, nta cyaha abibonamo, bityo akimuhanaguraho.

Ubushinjacyaha bwasabiye madamu Ingabire gufungwa imyaka 25 ku mpurirane y’ibyaha byose bwajuririye, bitandukanye n’igihano cya burundu bwamusabiye umwaka ushize.

Bwanasabiye abasirikare bane bareganwa na Ingabire Victoire, bakanamushinja Lt Col Noel Habiyaremye, Lt Tharcisse Nditurende, Major Vital Uwumuremyi na Captain Jean Marie Karuta gufungwa imyaka 10 ariko bakagabanyirizwa igihano kubera kwirega.

Si ubushinjacyaha bwonyine bwajuriye ariko. Ingabire nawe yajuririye igihano yahawe n’ibyaha yahamijwe…we n’abamushyigikiye bemeza ko bishingiye ku mpamvu za politike. Azabona umwanya we wo gusobanura ubujurire bwe ku munsi w’ejo.

BBC © 2014 BBC ntabwo yishingiye ibibera hanze y'imbuga zayo.

Uru rupapuro ruboneka neza ukoresheje amashakiro mashyashya ya CSS. Mugihe amashakiro yawe adakorana na CSS ntushobora kubona ibiri kuri uru rupapuro byose cyangwa neza. Niba bishoboka shakisha amashakiro mashyashya ya software cyangwa CSS niba washobora kubikora.