Perezida Assad aragabisha Israel ko itomutera

Ibiherutse kuvugururwa: 31 ukwa gatanu, 2013 - 05:45 GMT

Perezida Assad mu kiganiro kuri Al Manar TV

Mu kiganiro yahaye televisiyo yo muri Libani, perezida Assad yavuze ko hari icifuzo gikomeye mu banyagihugu, ko hotangurwa urugamba kuri Israel mu misozi ya Golan.

Yatangaje kandi ko Syria yoba imaze kuronka igice ca mbere c'ibirwanisho bikomeye vyo kurwanya ibitero vyo mu kirere, yahawe n'Uburusiya.

Israel yari yavuze ko izofata ibisasu vya missile vy'Uburusiya, nk'ikimenyetso c'uko umutekano wayo ubangfamiwe bikomeye.

Ivyo perezida Assad yabitangaje mu gihe umuganga aba mu gace ka Qusair hamazemwo intambara zikomeye, yamye yigana ingene ubuzima bw'abahaba buri mu kaga gakomeye.

Ngo hari abantu barenga 600 bakomeretse, mu turere twugarijwe n'intambara, badashobora kuronka ubufasha bw'abaganga.

Ngo bashobora kurindira amazi yo kunywa iminsi itatu canke ine, aho ntihavuzwe ayo bakeneye mu bindi bikorwa vya minsi yose nko kumesura.

Avuga kandi ko abagoire n'abana bakomeza kurwa mur'iyo ntambara yo gushaka kugenzura ako karere ka Qusair kari kuri km 30 uvuye Homs.

Uwo muganga avuga ko yabonye ibiziga vy'abarwanyi ba Hezbollah baturuka muri Libani, akavuga ko uruhara rwabo mur'iyo ntambara rushobora guhindura ibintu.

Umukuru w'urunani rw'abarwanya leta ya Syria "Free Syria army", general Selim Idriss, yabwiye BBC ku munsi wa gatau ko abarwanyi ba Hezbollah barenga 7000 baje mur'iyo ntambara ya Qusair.

Hagat'aho Leta zunze ubumwe za Amerika n'Ubwongereza biriko biratohoza amakuru avuga ko hari umunyamerikakazi n'Umwongereza baguye mu ntambara yo muri Syria.

Ibi bikurikiye amasanamu yaciye kuri television ya leta ya Syria, yerekana ibiziga vy'abakekwa kuba abo mu bihugu vya Bulaya na karangamuntu zabo, vyavurwa ko bishwe n'ingabo za leta mu ntara ya idlib.

Umuryango w'uwo mugore wahavuye utangaza ko yapfuye.

Yamenyekanye kw'izina rya Nicole Mansfield w'imyaka 33, yahinduye idini akaja muri islam, mu muji wa Flint muri Michigan.

Urugamba rushasha

Mu kiganiro yatanze kuri television ya Hezbollah al-Manar, perezida Assad yavuze ko amaze kugabisha impande zose biraba, ko Syria izokwivuna, yongeye kubona ibitero vya Israel.

Ati:"Hari icifuzo gishigikiwe bimwe bigaragara, co gutanguza urugamba rushasha rwo kwigwanako muri Golan".

Israel yifatiye imisozi ya Golan kuva mu ntambara yo mu 1967, yigarurira ako karere mu 1981, ariko n'ubu amakungu ntaremeza ko ayishigikiye ku vyo yakoze.

Ibitero vyo mu kirere vya Syria, vyakoze ku birindiro vya Israel vyo mur'iyo misozi ya Golan, n'ubwo atawuzi ko vyoba vyari bitumberejwe ku barwanyi bari ku rubibe, kandi Israel nayo yarishuye.

Syria na Israel vyabaye mu ntambara kuva mu 1948, ariko urwo rubibe rwari rumaze igihe rutekanye.

BBC © 2014 BBC ntabwo yishingiye ibibera hanze y'imbuga zayo.

Uru rupapuro ruboneka neza ukoresheje amashakiro mashyashya ya CSS. Mugihe amashakiro yawe adakorana na CSS ntushobora kubona ibiri kuri uru rupapuro byose cyangwa neza. Niba bishoboka shakisha amashakiro mashyashya ya software cyangwa CSS niba washobora kubikora.