Afghanistan: Ingabo z'Afghanistan zasimbuye iza NATO

NATO n'ingabo za Afghanistan

Abashinzwe umutekano muri Afghanistan bafashe kumugaragaro ibikorwa byo kurwana byari bisanzwe bikorwa n'umuryango wa NATO.

Mu muhango wabereye mu murwa mukuru wa Kabul, Prezida Hamid Karzai, yavuze ko ari igikorwa kizaba amateka y'igihugu.

Yongeye gushimangira ku mahinduka y'uburyo bwo kurwana, avuga ko mu gihe kirimbere hatazongera gukoreshwa ibitero by'indege za gisirikare kubyo yise ingo n'imidugudu y'abanyafghanistan.

Ikibazo cy'ibitero by'indege za NATO n'inkomere z'abaturage cyakomeje kuvugwa. Iri hererekanywa rya NATO n'igisirikare cya Afghanistan ribaye hashize hafi imyaka 12 ingabo za mbere z'Amerika zinjiye k'ubutaka bwa Afghanistan.

Ingabo mpuzamahanga ariko zizahaguma kugeza mu mpera z'umwaka utaha w'i 2014. Zizajya zitoza ingabo za Afghanistan.