Morsi arashinjwa gukorana na Hamas

Kugeza ubu aho Morsi afungiye ntihari hatangazwa
Image caption Kugeza ubu aho Morsi afungiye ntihari hatangazwa

Abategetsi ba Misiri batangaje ko Mohammed Morsi wahoze ayobora icyo gihugu afunze kubera ko ashinjwa gukorana n'umutwe w'intagondwa z'abanyapalestina wa Hamas.

Ngo yafatanije n'uwo mutwe mu gucura umugambi wo kugaba ibitero ku magereza kugirango bafungure intagondwa z'abayislamu igihe habaga imyigaragambyo y'abaturage yarwanyaga ubutegetsi bwa Hosni Mubarak muri 2011.

Bwana Morsi afungiwe ahantu hatari hamenyekana kuva aho igisirikare kimuvaniye ku butegetsi ku itariki ya 3 z'ukwezi kwa karindwi.

Hagati aho abantu ibihumbi n'ibihumbi bashyigikiye hamwe n'abadashigikiye umukuru w'igihugu wavanywe ku butegetsi mu Misiri, Mohamed Morsi, bahuriye kuri uyu wa gatanu mu mihanda y'i Cairo no mu yindi mijyi, mu myigaragambyo isa naho igamije kwerekana abarusha abandi ingufu.

Habaye ibikorwa byo gukozanyaho bidakabije hagati y'impande zombi.

Mu ntangiriro za kino cyumweru, umukuru w'igisirikare Abdul Fattah al-Sisi, yahamagariye abantu gukora imyigaragambyo yo gushyigiikira igisirikare ku cyemezo yafashe cyo guhirika ubutegetsi bwa Mohammed Morsi maze kigashyiraho ubutegetsi bw'agateganyo.

.