Iraq: Ibisasu byahitanye abantu 51

Ibisasi muri Iraq

Hari ibisasu byaturikiye mu mamodoka mu majyepfo ya Iraq no hagati mu gihugu, bihitana abantu bagera kuri 51.

Abandi benshi bakomeretse. Igipolisi cyavuze ko ibyo bisasu byagabwe ahanini mu duce tubamo abaShia.

Ngo byari bigambiriye ahantu hari amasoko cyangwa mu mihanda igendwamo abantu benshi kandi mu masaha abamo urujya n'uruza.

Umunyamakuru wa BBC uriyo aravuga ko ibyo bisasu byatezwe n'umutwe w'abaSunni ukorana na Al-Qaeda.

Ibi kandi bikurikiye ubundi bwicanyi bwagiye bukorwa kuva mu kwezi kwa 4 bugahitana abantu bagera ku bihumbi 3.

Abanyairaq barenga ibihumbi 2.500 bamaze kwicwa kuva mu kwezi kwa 4.

Umuryango w'abibumbye utangaza ayo makuru uravuga ko aribwo bwicanyi bukabije bubaye muri Iraq kuva mu mwaka w'i 2008. Ubu bwicanyi buraterwa n'amatate ari hagati y'abaSunni n'abaShia.

AbaSunni bavuga ko bakumiriwe muri leta iyobowe n'umushikiranganji wa mbere, Nouri Maliki.

Igipolisi kivuga ko ibisasu byaturikiye i Baghdad, byari bihishe mu modoka ziri ku masoko n'ahantu bahagarika amamodoka mu mujyi.

Icyari gikaze ariko ngo cyaturikiye mu gace k'uburasirazuba k'umujyi wa Sadr, gatuwemo n'abaShia.

Hari n'igisasu cyaturikiye i Mahmudiya, mu majyepfo ya Baghdad, gihitana abantu 2.

Hari n'ikindi cyaturikiye mumodoka i Basra, mu mujyi wa kabiri ukomeye.

Ibi nibyo bitero bihitanye abantu benshi muri uku kwezi kwa Ramadan, abayisilamu batangiye igisibo.

Ni nabyo bibi bibaye kuvaho abasirikare b'Amerika baviriye muri Iraq mu mwaka w'i 2011.

Abantu barenga 700 bamaze gupfa muri uku kwezi kwa 7 gusa.