RCA: Michel Djotodia yarahiye

Michel Djotodia yari ayobowe inyesyamba zahiritse ubutegetsi
Image caption Djotodia yari ayobowe inyesyamba zahiritse ubutegetsi

Michel Djotodia, wahoze ari umukuru w'inyeshyamba muri Repubulika ya Santarafurika (RCA) yarahiriye kuyobora icyo gihugu mu gihe cy'inzibacyuho kizageza ku matora.

Icyo gihugu ubu cyugarijwe n'ikibazo gikomeye cy'umutekano.

Nyuma y'amezi hafi atanu afashe ubutegetsi, Michel Djotodia yarahiriye mu muhango wari witabiriwe n'umukuru w'gihugu cya Congo, Denis Sassou Nguesso akaba umuhuza muri icyo gihugu; hari kandi n'umukuru w'igihugu cya Tchad, Idris Deby akaba n'umukuru w'umuryango w'ubukungu uhuriweho n'ibihugu byo muri Afurika yo hagata (CEEAC).

Uku kurahira kuje gukurikira ishyirwaho ry'inteko nshingamategeko y'agateganyo n'urukiko rurengera itegeko nshinga rw'agateganyo.

Ishyirwaho rya zino nzego zari ryasabwe n'abakuru b'ibihugu bya CEEAC mu nama yabaye mu kwezi kwa kane kugirango ubutegetsi bushya bushyirweho hagendeye ku mategeko.

Inyeshyamba zo mu mutwe wa Seleka zahiritse ubutegetsi bwa Francois Bozize mu kwezi kwa gatatu k'uyu mwaka.

Francois Bozize ubu ari mu Bufaransa.

Nyuma y'amezi 18 y'ubutegetsi bw'inzibacyuho, Michel Djotodia asabwa gukoresha amatora rusange.