Amerika: umugabo wari warashimuse abagore 3 yiyahuye

Iyi nzu Castro yari yashimutiyemo abo bagore yarasenywe
Image caption Iyi nzu Castro yari yarafungiyemo abo bagore yarasenywe

Ariel Castro wari warashimuse abagore batatu muri leta ya Ohio muri Amerika mu gihe k'imyaka byibura 10 yiyahuriye muri gereza.

Abakozi bo muri gereza yari afungiyemo baravugako yapfiriye mu bitaro ku wa kabiri nyuma yaho abaganga bananiriwe kumumuzanzamura.

Mbere yuko ajyanwa mu bitaro abakozi ba gereza bari bamusanze yimanitse mu cyumba yari afungiyemo.

Uyu mugabo wari ufite imyaka 53 yari yarashimuse abagore batatu mu gihe k'imyaka igera ku 10 kugeza mu kwezi kwa gatanu muri uyu mwaka.

Abo bagore yari yarabafungiye mu nzu akoresheje iminyururu kandi akanabafata ku ngufu.

Ku itariki ya 1 y'ukwezi gushize, urukiko rwari rwaramukatiye gufungwa ubuzima bwe bwose kongeraho indi myaka 1000.

Inzu yari yarafungiyemo abo bagore ubu yarasenywe.

Ariel Castro wahoze ari umushoferi wa bisi ijyana abana ku ishuri yari yarashimuse Michelle Knight w'imyaka 32, Amanda Berry w'imyaka 27 na Gina DeJesus w'imyaka 23.

Yabafatiye mu muhanda hagati y'imyaka ya 2002 na 2004.