UEFA yahannye CSKA Moscow ku kibazo cya Touré

Yaya Touré
Image caption Umukinnyi wo hagati Yaya Touré

Ishyirahamwe ry'umupira w'amaguru i Burayi, UEFA, ryategetse ko uruhande rumwe rwa stade ya ekipe yo m'Uburusiya, CSKA Moscow, rufungwa, nyuma y'ibirego by'ibitutsi by'ivangura moko bivugwa ko abashyigikiye iyo kipe batutse Yaya Touré.

Mu nyandiko iryo shyirahamwe ryavuze ko ridashyigikiye ivangura ry'amoko, ryongera ho ko ryategetse CSKA Moscow kuzakina umukino utaha wa Champions League n'uruhande rumwe rwa stade rufunze.

CSKA Moscow izahura n'ikipe yo m'Ubudage ya Bayern Munich ku itariki ya 27 z'ukwezi kwa cumi na rimwe.

Icyumweru gishize umukinnyi wo hagati wa Manchester City na Cote d'Ivoire, Yaya Touré, yavuze ko abashyigikiye CSKA Moscow bamututse kubera ibara ry'uruhu rwe.

Iyo kipe yo m'Uburusiya ihakana ibyo birego.