Umusomaliya acyekwaho uruhare ku mahano ya Lampedusa

Lampedusa
Image caption Ubwato ku kirwa cya Lampedusa

Igipolisi m'Ubutaliyani cyafashe umunyasomaliya w'imyaka 24, ucyekwaho ko ashobora kuba yaragize uruhare ku mahano yabaye Lampedusa aho abimukira 366 barohamiye.

Uwo mugabo uvugwa ho ko akorana n'umutwe ukoresha intwaro, arashinjwa kuba ari muri bamwe bazana abimukira i Burayi ku buryo butemewe n'amategeko.

Yafatiwe ku kirwa cya Lampedusa.

Undi mugabo, umunyatunisiya ucyekwaho ko ari we wari umusare wubwo bwato bwarohamiye hagati ya Malta n'ikirwa cy'Ubutaliyani cya Lampedusa, Khaled Bensalam, yafatiwe ku kirwa cya Sicile.

Abenshi mubaguye mur'ubwo bwato ukwezi gushize bakomokaga muri Eritrea na Somaliya.

Ubwo bwato bwari butwaye abimukira b'abanyafurika bagera kuri 500 bwahiye mbere yuko bwibira hafi y'icyo kirwa kiri hafi y'Afrika yo mujyaruguru.

Harokotsemo abantu 155.

Hari amakuru m'Ubutaliyani ko uwo mugabo yavuga ga ko nawe ari umwimukira waruhunze imirwano n'ubukene mu gihugu cye, ariko abarokokeye muri ubwo bwato bavuze ko yari umwe mu bazana abimukira mu Burayi.