S. Sudani: Ibiganiro byatangiye

  • 3 Ukwa mbere 2014
Impunzi zakuwe mu byabo muri Sudani yepfo

Ibiganiro bigenewe kurangiza imirwano muri Sudani yepfo byatangiye muri Ethiyopiya.

Abahagarariye leta n'intagondwa baragira ibiganiro uy'umunsi n'abahuza mu murwa mukuru wa Addis Ababa, ariko izo mpande zombi ntizirahura imbonankubone.

Byibura abantu 1000 baguye mu mvururu zatangiye ukwezi gushize hagati y'ingabo zishyigikiye perezida Salva Kiir n'abashyigikiye uwahoze amwungirije, Riek Machar.

Leta zunze ubumwe za Amerika zatahuye abakozi muri ambassade yabo muri icyo gihugu, bavuga ko umutekano ukomeje guhungabana.

Leta ya Sudani yepfo ikomeje kugerageza gusubirana imijyi ya Bor na Bentiu.

Hagati aho haravugwa ko ingabo z'intagondwa zikomeje kwegera umurwa mukuru wa Juba.