Yanukovych yasabwe kugarura umutekano

  • 31 Ukwa mbere 2014
Perezida wa Ukraine Viktor Yanukovych

Igisirikare muri Ukraine cyasabye perezida Viktor Yanukovych gutera intambwe yo kugarura umutekano mu gihugu, muri iki gihe imyigaragambyo y'abatavuga rumwe na leta ikomeje.

Itangazo ryasohowe na ministeri y'ingabo ryagabishije ko ikibazo cya politike gishobora kwangiza isura ya Ukraine mu bindi bihugu.

Iryo tangazo rije mu gihe perezida Viktor Yanukovych amaze gusinya itegeko riha imbabazi rusange abigaragambya bari baratawe muri yombi, akanakuraho amategeko aherutse gushingwa akumira imyigaragambyo.

Ariko abatavuga rumwe n'ubutegetsi bamaganye ibyo bikorwa bya leta.

Andi makuru aravuga ko impirimbanyi ikomeye cyane mu barwanya leta ya Ukraine, Dymtro Bulatov, wari warabuze icyumweru gishize yavuze ko yashimuswe, kandi akanatotezwa.

Umuyobozi w'ishyirahamwe riharanira uburenganzira bw'ikiremwamuntu muri LONI yasabye ko hakorwa iperereza mu birego by'ishimutwa n'itotezwa muri Ukraine mu gihe icyo gihugu gifite ibibazo bya politike.