Ibihugu bikomeye ntibyumvikana kuri Ukraine

  • 1 Ukwa kabiri 2014
Abigaragambya barasaba Perezida Yanukovych kwegura Image copyright Reuters
Image caption Abigaragambya barasaba Perezida Yanukovych kwegura

Ikibazo cy'akazaza ka Ukraine cyatumye abahagarariye Amerika, ibihugu by'Uburayi n'Uburusiya baterana amagambo mu nama mpuzamahanga k'umutekano ibera i Munich.

Umukuru w'urwego ruyobora umuryango w'ubumwe bw'Uburayi - Herman Van Rompuy - yavuze ko akazaza ka Ukraine kari muri uwo muryango naho ministri w'ububanyi n'amahanga wa Leta zunze ubumwe z'Amerika, John Kerry, avuga ko igihugu cye gishyigikiye icyo yise intambara ya demokarasi muri Ukraine.

Ku ruhande rw'Uburusiya, ministri w'ububanyi n'amahanga wabwo - Sergei Lavrov - we yashinje umuryango w'ubumwe bw'Uburayi gushyigikira imyigaragambyo irimo ibikorwa by'urugomo n'ibitero byibasira igipolisi.

Mu gihugu cya Ukraine hamaze igihe havugwa umwuka mubi kuvaho mu kwezi kwa 11 k'umwaka ushize Perezida Viktor Yanukovych yangiye gushyira umukono ku masezerano y'ubufatanye hagati y'igihugu cye n'umuryango w'ubumwe bw'Uburayi, agahitamo ahubwo kurushaho kwegereza igihugu cye Uburusiya.