Ukraine Denis Berezovsky yahagaritswe

Denis Berezovsky Uwufise ububasha kw’isanamu Reuters
Image caption Yarakuriye igisirikare kirwanira mu mazi muri Ukraine

Umukuru w'igisirikare kirwanira mu mazi cya Ukraine, Denis Berezovsky, yakuwe mu mirimo ye nyuma yaho avugiye ko ashyigikiye abategetsi bashya b'i Crimea bakorana n'abategetsi b'Uburusiya.

Leta ya Kiev yatangiye kumukoraho iperereza ku cyaha cy'ubugambanyi.

Uku kujya mu kindi gice kwe kubaye mu gihe igisirikare cy'Uburusiya gikomeje kwongera ibikorwa muri Crimea.

Kare leta y'inzibacyuho yo muri Ukraine yareze Uburusiya ko bwatangaje intambara, maze ihamagarira abasirikare bayo kwitegura.

Moscow yavuze ko iri gukingira abarusiya bari muri Ukraine kuri leta yise y'intagondwa kandi itemewe n'amategeko.

Abategetsi b'i Kiev bategetse ko haba ubukangurambaga bwose mu gihe Uburusiya bukomeje kwongera ingabo mu kirwa cya Crimea.

Basabye ingabo z'igihugu kwitegura, banahamagaza abavuye mu gisirikare ariko abategetsi ba Ukraine bavuga ko batazaba abambere mu gushoza intambara.

Ukraine kandi yari yagabishije ko igikorwa cya gisirikare cya Moscow kizaba gitangije intambara kandi imibano y'ibihugu byombi ikaba irarangiye.

Kugeza ubu ariko nta mvururu zari zaba nubwo hari kuboneka amato menshi ya gisirikare y'Uburusiya mu kirwa cya Crimea kandi BBC yabonye abasa n'abasirikare b'abarusiya bari gucukura imyobo mu karere kegereye umupaka.

Hari ibigo bimwe bya gisirikare byo muri Crimea byambuwe intwaro.