Urubanza rw'aba "FDLR" rwasubitswe

Abaregwa gukorana na FDLR bageze murukiko i Kigali Uwufise ububasha kw’isanamu Getty
Image caption Abaregwa gukorana na FDLR bageze murukiko i Kigali

Urukiko rukuru rwa Kigali rwasubitse urubanza rw’abantu 13 bivugwa ko ari abo mu mutwe wa FDLR bafungiye mu Rwanda baregwa ibyaha birimo iterabwoba.

Urubanza rwasubitswe kubera ko bamwe mu baregwa batitabye urukiko, ubushinjacyaha bukavuga ko ari ngombwa kubaregera hamwe kuko hari abahuriye mu mugambi w’icyaha.

Abaregwa bakomoka mu duce tunyuranye tw’igihugu, iyi ngo ikaba ari yo mpamvu bagomba gukurikiranirwa ku cyicaro gikuru cy’urukiko rukuru.

Abaregwa uko ari 13, ubushinjacyaha buvuga ko ari abo mu mutwe wa FDLR urwanyiriza u Rwanda ku butaka bwa Kongo.

Ubushinjacyaha bubarega ibyaha by’ubwicanyi kuko barimo babiri baregwa guhitana abakozi babiri ba Pariki y’ibirunga mu Kinigi.

Bubashinja kandi gukwirakwiza intwaro mu gihugu kuko ngo hari abazifatanywe.

Hari abagiye mu ngando za Mutobo

Mu bakurikiranywe ngo hari n’abari bararangije ingando mu kigo cya Mutobo, gihugurirwamo abahoze ari abarwanyi mbere yo gusubizwa mu buzima busanzwe.

Aba bashinjwa ubugambanyi n’ubutasi, ubushinjacyaha buvuga ko bajyanaga amakuru muri FDLR nyuma yo gusubira aho bakomoka barangije amahugurwa ya Mutobo.

Ngo hari abafatiwe mu duce twa Kabuhanga na Bugeshi duhana umupaka na Kongo, cyakora ngo hari n’abafatiwe mu gace ka Nyabugogo binjira mu mujyi wa Kigali.

Aba mbere ngo bafashwe mu mwaka wa 2012, ngo bakaba bari mu kigero kiri hagati y’imyaka 25 na 32.