Abahitanwa na Ebola bariyongera muri Sierra Leone

Muri rusange abantu 539 nibo Ebola imaze guhitana muri ako karere Uwufise ububasha kw’isanamu AFP
Image caption Abantu 539 nibo Ebola imaze guhitana muri Afurika y'uburengerazuba

Hakomeje kuboneka abandi bantu banduye indwara ya Ebola mu bihugu bya Sierra Leone na Liberia.

Ishami rya ONU ryita ku buzima, OMS, riravuga ko mu minsi itatu gusa muri iki cyumweru hari abandi bantu 19 bazize iyi ndwara.

Iyi mibare irerekana ko kurwanya Ebola bitoroshye muri Sierra Leone nkuko byatangajwe n'umuryango utanga imfashanyo, MSF.

Muri rusange Ebola imaze guhitana abantu 539 muri Afurika y'uburengerazuba kuva aho ibonekeye bwa mbere muri ako karere mu gihugu cya Guinee mu kwezi kwa kabiri.

Abakuru b'ibihugu byo muri ako karere bamaze gushyiraho ikigega cyo cyo kurwanya ikwirakwira ry'iyo ndwara.

Mu nama y'umuryango uhuriweho n'ibihugu byo muri Afurika y'Uburengerazuba - Ecowas - yabereye muri Ghana ku wa kane, Perezida wa Nigeria, Goodluck Jonathan yemeye ko igihugu cye kizatanga miliyoni 3 z'amadolari azajya muri icyo kigega.

Kugeza ubungubu Ebola nta rukingo nta n'umuti igira.