Imirwano ikomeye i Luhansk

Image caption Imirwano hagati y'ingabo za Ukraine n'inyeshyamba irakomeje

Ubutegetsi bwa Ukraine buravuga ko hari kuba imirwano mu mihanda hagati mu mujyi wa Luhansk, hagati y'ingabo za leta n'abarwanyi bashyigikiye Uburusiya bashaka kwiyomora kuri Ukraine.

Ubutegetsi buravuga ko ingabo za Ukraine kugeza ubu zimaze kwigarurira akarere kamwe muri uwo mujyi usanzwe ari indiri y'izo nyeshyamba mu burasirazuba bwa Ukraine.

Nta makuru yigenga ahamya ibivugwa na leta, ariko umunyamakuru wa BBC aravuga ko niba ibivugwa ari ukuri, aya makuru yerekana ko leta yateye intambwe nini mu mirwano imaze amezi 4 irwanya izo nyeshyamba.

Hagati aho, ikibazo cy'ubutabazi mu burasirazuba bwa Ukraine gikomeje kwiyongera.

Haravugwa ko abantu bageze ku bihumbi 250 ubu babaho nta mazi n'amashanyarazi, kandi ko ibiribwa n'imiti bikomeje kuba bike.