Umukozi wa ONU yahitanwe na Ebola mu Budage

Ebola imaze guhitana abantu barenga 4000 muri Afurika y'Uburengerazuba.
Image caption Ebola imaze guhitana abantu barenga 4000 muri Afurika y'Uburengerazuba.

Umukozi wa ONU wanduye indwara ya Ebola yaguye mu bitaro byo mu mujyi wa Leipzig mu Budage.

Uyu mugabo w’imyaka 56 yari umukozi wo mu buvuzi wa ONU akaba yaranduriye Ebola muri Liberia – kimwe mu bihugu byibasiwe cyane n’iyo ndwara.

Yaje kwivuriza mu Budage kuwa kane w’icyumweru gishize maze ahita atangira kuvurirwa mu kato.

Uyu mugabo, izina rye ritari ryatangazwa, biravugwa ko akomoka muri Sudani.

Yabaye umuntu wa gatatu wagiye kwivuriza Ebola mu Budage.

Hari undi murwayi ukivurirwa mu bitaro by’i Frankfurt mu gihe uwa gatatu we yasezerewe mu bitaro nyuma y’ibyumweru bitanu avurwa.

Indwara ya Ebola imaze guhitana abantu barenga 4000 muri Afurika y’Uburengerezuba guhera mu kwezi kwa gatatu, cyane cyane muri Liberia, Sierra Leone, Guinee na Nigeria.