Boko Haram irashinjwa gushimuta abandi bagore

Mu ntangiriro z'uyu mwaka Boko Haram yashimuse abakobwa barenga 200. Uwufise ububasha kw’isanamu Reuters
Image caption Mu ntangiriro z'uyu mwaka Boko Haram yashimuse abakobwa barenga 200.

Abantu batuye mu majyaruguru y'uburasirazuba bwa Nigeria baravuga ko umutwe ugendera ku matwara akaze y'idini ya Isilamu wa Boko Haram washimuse abagore babarirwa muri za mirongo mu mirenge ibiri yo muri leta ya Adamawa.

Baravuga ko abarwanyi b'uwo mutwe bagabye igitero kuri iyo mirenge maze bagashimuta abagore n'abakobwa.

Iyi nkuru ntabwo yari yemezwa n'ubutegetsi ariko abahatuye baravuga ko ibi byabaye nyuma y'umunsi umwe igisirikare cya Nigeria gitangaje ko cyumvikanye na Boko Haram ku masezerano yo guhagarika imirwano.

Ayo masezerano ngo yari gutuma Boko Haram irekura abanyeshuri b'abakobwa barenga 200 yashimuse mu ntangiriro z'uyu mwaka.

Umunyamakuru wa BBC uri muri Nigeria aravuga ko ibikorwa by'urugomo byakomeje kuva aho hatangarijwe inkuru y'amasezerano y'ihagarika ry'imirwano.