Boko Haram ngo nta masezerano yagiranye na leta

Mu ntangiriro z'uyu mwaka Boko Haram yashimuse abanyeshuri b'abakobwa barenga 200 Uwufise ububasha kw’isanamu AP
Image caption Boko Haram iracyafite abanyeshuri b'abakobwa barenga 200 yashimuse.

Intagondwa zo mu mutwe wa Boko Haram zahakanye amakuru yatangajwe na leta ya Nigeria avuga ko bagiranye amasezerano yo guhagarika imirwano no kurekura abakobwa 219 washimuse.

Umukuru w’uwo mutwe, Abubakar Shekau, yavuze ko abo banyeshuri b’abakobwa ubu binjiye mu idini ya Islamu kandi ko kuva aho bashimutiwe ubu bashyingiwe.

Leta ya Nigeria yatangaje ku itariki ya 17 z’ukwezi kwa cumi ko yagiranye amasezerano yo guhagarika imirwano n’uwo mutwe kandi ko n’abo bakobwa bagiye kurekurwa vuba.

Ariko rero ibyo ntibyabujije ibikorwa by’urugomo by’uwo mutwe gukomeza ku buryo no ku wa gatanu wa kino cyumweru hari igisasu cyaturitse gihitana abantu.

Muri video yashyizwe ahagaragara, Abubakar Shekau, yagize ati: “Nta muntu twasinyanye amasezerano yo guhagarika imirwano, nta muntu twagiranye imishyikirano. Ni ikinyoma.”

Boko Haram yatangiye kugaba ibitero muri 2009 kandi biravugwa ko abaturage b’abasivile babiguyemo muri uyu mwaka bagera ku 2000.