Abahitanwa na malaria baragabanutse

Umubare w'abandura malaria muri Afurika waragabanutse Uwufise ububasha kw’isanamu AFP
Image caption Umubare w'abandura malaria muri Afurika waragabanutse

Ingamba zikomeye zo kurwanya malaria hirya no hino ku isi zatumye umubare w'abahitanwa n'iyo ndwara ugabanukaho kabiri mu myaka 10 ishize.

Ibyo ni ibitangazwa n'ishami rya ONU ryita ku buzima - OMS - rivuga ko hagati ya 2001 na 2013 abantu babarirwa kuri miliyoni 4.3 batahitanwe na malaria.

Uwo mubare urimo abana bari munsi y'imyaka itanu bagera kuri miliyoni 3.9 bari mu bihugu bya Afurika biri munsi y'ubutayu bwa Sahara.

OMS iravuga ko buri mwaka abantu benshi barimo kugerwaho n'ingamba zikomeye zo kurwanya malaria.

Mu mwaka wa 2004, 3% by'abantu bari babangamiwe na malaria nibo bonyine babonye inzitiramibu, mu gihe ubu uwo mubare ugeze kuri 50%.

Gupima iyi ndwara nabyo byakajije umurego kandi abantu benshi ubu babasha kubona imiti iyivura.

Muri Afurika aho 90% by'abantu bahitanwa na malaria baboneka, umubare w'abayandura waragabanutse cyane.

OMS ivuga kandi ko ahandi ku isi hari ibihugu biri mu nzira yo kurwanya iyo ndwara burundu.

Umwaka ushize muri Azerbaijan na Sri Lanka ku nshuro ya mbere nta malaria yahabonetse.

Muri Afurika, Misiri na Maroc nabyo ngo biri mu nzira yo kurwanya iyo ndwara burundu.