Ibibazo bijanye n'imyiteguro ya CAF 2015

Uwufise ububasha kw’isanamu
Image caption Guinee Equatoriale yasubiriye Maroc kwakira CAF 2015

Mu kwezi kwa 12 ni bwo igihugu cyemerewe kwakira iyi mikino nyuma y'aho Morocco yari kugitegura isabiye ko imikino ya nyuma y'iki gikombe yigizwayo igaragaza impungenge z'icyorezo cya Ebola ariko iki cyifuzo kigaterwa utwatsi n'ishyirahamwe ry'umupira w'amaguru muri Africa -CAF.

Kubera igihe gito Guinne Equatorial yahawe cyo kwitegura, icyoba ni cyose ko abantu bashobora kwitabuira imikino atari benshi cyane cyane abaturuka ku mu bice by'icyaro.

Izindi mpungenge ni iz'ibikorwa remezo n'ibindi bintu bya nkenerwa kandi n'umupira w'amaguru ukaba udateye imbere cyane muri iki gihugu.

BBC yagerageje gutera akajisho ku bibazo umupira w'amaguru ufite muri rusange haba mu kibuga cyangwa se hanze yacyo.

Ntabwo ari ubwa mbere iki gihugu gito ariko gikungahaye kuri peteroli gituwe n'abantu ibihumbi 740'000 gusa cyakira iri rushanwa.

Mu mwaka wa 2012 bafatanije na Gabon kwakira imikino ya nyuma y'iki gikombe.

Ariko ubu noneho iki gihugu gifite umuzigo wo gutegura icyo nyine iri rushanwa kandi cyarabimenyeshejwe ku munota wan yuma.

Ibi bishobora kuba ikibazo gikomeye.

Imijyi 4 ni yo izakira imikino :Bata na Malabo nk'uko byari byagenze mu myaka 3 ashize ,hakiyongeraho imijyi ya Mongomo na Ebebiyin.

Muri iyi mijyi mishya, nta bitangaza byahitegwa kubera ko nta gihe bahawe cyo kubakwa ibikorwa remezo bigezweho. Ikibuga cyo mu mujyi wa Ebebiyin bivugwa ko gifite ubushobozi bwo kwakira abantu 5,000 gusa.

Nubwo ibintu bimeze gutya ariko biranashoboka cyane ko hataboneka abantu buzuye iki kibuga ku munsi w'imikino.Mu mwaka wa 2012 hari umukino warebwe n'abantu 200 gusa.

Imibare nk'uyu ni yo yatumye umukuru w'igihugu Teodoro Obiang Nguema ubwe yikora ku mufuka akishyurira amatiki abantu 40,000kugira ngo bashobore kuzajya kureba imikino.

Presida Nguema yagize ati"ni ngombwa ko tugurira abantu amatiki kugira ngo ibibuga byuzure. Abafite ubushobozi nibafashe abakene"

Ikindi kibazo ni uko amahoteli yo muri iyi mijyi izakira imikino bwa mbere afite ubushobozi budahagije bwo kwakira abashyitsi, bikaba bitoroheye abanyuamakuru n'abakunzi b'umupira w'amaguru kubona aho bacumbika kugira ngo bashobore gukurikira imikino.

Mu kibuga, nta byinshi bitegerejwe ku kipe y'igihugu kizakira imikino.Byaba bitunguranye ndetse bikandikwa mu mateka iyi kipe ibaye iya 12 yakiriye iki gikombe igashobora kucyegukana.

Amahirwe y'iki gihugu kandi aragabanurwa no kuba umutoza Esteban Becker ukomoka muri Argentine yarahawe aka kazi hasigaye iminsi 11 gusa ngo irushanwa ritangire.

Guinnee Equatorial yakunze kurangwa na politiki yo kwinjiza abakinnyi benshi b'abanyamahanga mu ikipe y'igihugu.

Iyi ni na yo mpamvu yari yatumye iki gihugu gisezererwa mu majonjora gihaniwe ko cyari cyakinishije umukinyi utemewe -Umunya Cameroun Thierry Fidieu Tazemeta ubwo bahuraga na Mauritania