Umunsi wa 4 w'imyigaragambyo muri Congo

Imyigaragambyo i Knshasa Uwufise ububasha kw’isanamu
Image caption Imyigaragambyo i Knshasa

Amakuru aturuka muri Repubulika iharanira demokarasi ya Congo aravuga ko igipolisi cyarashe ku bantu bari myigaragambyo mu mujyi wa Goma uri mu burasirazuba bw'igihugu.

Uyu ni umunsi wa kane w'imyigaragambyo yamagana amahinduka mu itegeko rigenga amatora avuga ko hagomba kubanza kubaho ibarura ry'abaturage mbere y'amatora y'umukuru w'igihugu ateganijwe mu mwaka utaha.

Abashinzwe umutekano baje nyuma yaho abantu babarirwa mu magana bashyiraga mu mihanda za bariyere zakakaga umuriro. Ibiro ntaramakuru by'Ubufaransa AFP biravuga ko byibura abanyeshuri babiri bakomeretse.

Amashyaka atavuga rumwe na leta aravuga ko itegeko rishaka gushyirwaho rigamije gutinza amatora kugirango Perezida Joseph Kabila atinde ku butegetsi nyuma yo kurangiza manda ye umwaka utaha.

Ejo umukuru wa Kiliziya gatolika muri Repubulika iharanira demokarasi ya Congo yatangaje ko ashyigikiye iyo myigaragambyo.

Cardinal Laurent Monsengwo yasabye abategetsi guhagarika kwica abaturage nkuko yabyivugiye mu magambo ye.

Yasabye abari mu myigaragambyo kuyikora mu mahoro.

Imiryango iharanira uburenganzira bw'ikiremwamuntu iravuga ko abantu barenga 40 bamaze kugwa muri iyo myigaragambyo.

Leta ya Congo yo yavuze ko abantu bagera kuri 11 baguye muri izo mvururu kuva kuwa mbere kandi ko benshi ari abasahuraga.

Amashyaka atavuga rumwe na leta aravuga ko itegeko rishaka gushyirwaho rigamije gutinza amatora kugirango Perezida Joseph Kabila atinde ku butegetsi nyuma yo kurangiza manda ye umwaka utaha.