Burundi: Abaturage barasabwa inkunga y'amatora

Uwufise ububasha kw’isanamu AFP
Image caption Perezida Pierre Nkurunziza w'u Burundi

Hashize ibyumweru byinshi haba imyigaragambyo irimo urugomo n'ihirika ry'ubutegetsi ryapfubye.

Perezida Nkurunziza ari guhatanira kwiyamamaza gutegeka ku nshuro ya gatatu.

Icyemezo cyateje impagarara. Ku rubuga nkoranyambaga rwa Facebook, ibiro by'umukuru w'igihugu byahamagariye abantu gutanga inkunga.

Itangazo rirasaba "Ku baturage bakunda igihugu gushimangira umuco wa demokarasi ishingiye ku mahitamo ya rubanda". Rikanatanga konti yo kunyuzwamo amafaranga.

Umuryango w'ubumwe bw'uburayi wavuze ko uzahagarika miliyoni zirenga ebyiri z'amadorali (USD 2,000,000) yari gufasha mu matora.

Kubera ko ubona ibya ngombwa byatuma amatora aba mu bwisanzure n'amahoro mu gihugu bidahari.

Ingengo y'imari iteganyijwe mu matora yari yamaze kuba nto, nyuma y'uko u Bubiligi buhagarikiye inkunga yabwo ingana n'iyahagaritswe n'umuryango w'uburayi ku matora.

Amatora y'abagize inteko ishinga amategeko yari ateganyijwe kuri uyu wa kabiri. Ariko yasubitswehi iminsi 10.

Abanenga perezida Nkurunziza bavuga ko kwitoza kwe ku nshuro ya gatatu binyuranye n'itegekonshinga.

Urukiko rucyemura ibibazo bishingiye ku itegeko nshinga ruvuga ko itorwa rya mbere rya bwana Nkurunziza ritabarwa, kuko yatowe n'inteko ishinga amategeko, aho gutorwa n'abaturage.

Umujyanama wa perezida, Willy Nyamitwe, yatangarije BBC ko ari ngombwa ko leta ifata izo ngingo kandi ko umukuru w'igihugu abifitiye uburenganzira.

Kandi yemeza ko inkunga izatangwa ku bushake.

Yagize ati : "Ntawe uzafatwa ku ngufu ngo atange itwererano". "Twizeye intwererano nini ishoboka kuko abifuza ko amatora aba ni bo benshi rero ufite icyo atwerera akazagitwerera".

Nta mubare w'amafaranga leta yizera gukura mu nkunga z'abaturage watangajwe. Ariko yavuze ko abaturage bazamenyeshwa ingano yayo n'umubare w'abayatanze.