Afurika yepfo iravuga ko itafashije Bashir

Perezida Omar al-Bashir ashakishwa n'urukiko rwa ICC. Uwufise ububasha kw’isanamu Reuters
Image caption Perezida Omar al-Bashir ashakishwa n'urukiko rwa ICC.

Leta ya Afurika yepfo yahakanye amakuru avuga ko abaministri bayo bafashije mu ibanga Perezida wa Sudani kuva muri Afurika yepfo.

Iravuga ko izaha urukiko rukuru ibisobanuro byuzuye ku kuntu Omar al-Bashir yasohotse mu gihugu kandi urukiko rwari rwategetse ko ahaguma.

Ishyaka rikomeye mu yatavuga rumwe na leta muri Afurika yepfo ryasabye ko hakorwa iperereza ryuzuye ku cyatumye leta inanirwa guta muri yombi Perezida wa Sudani Omar al-Bashir ushakishwa n'urukiko mpuzamahanga mpanabyaha rwa ICC.

Uru rukiko rumushinja ibyaha bya jenoside.

Perezida Bashir yari muri Afurika yepfo mu cyumweru gishize aho yari yagiye mu nama y'abakuru b'ibihugu bigize umuryango w'ubumwe bwa Afurika.

Yabashije ariko gusubira mu gihugu cye nta kibazo nubwo bwose urukiko rwo muri Afurika yepfo rwari rwategetse ko atasohoka mu gihugu.

Ishyaka rya Democratic Alliance rivuga ko hagombye kumenyekana uwatanze itegeko ryo gukoresha umutungo wa leta mu korohereza Bashir kuva mu gihugu.

Rirashinja ubutegetsi kuba bwari mu mugambi wateguwe neza wo kumufasha gusohoka mu gihugu.