Ibiganiro bya politike mu Burundi ntibyakomeje

Ibiganiro byagombaga guhagarikirwa na Abdoulaye Bathily (i buryo)
Image caption Ibiganiro byagombaga guhagarikirwa na Abdoulaye Bathily (i buryo)

Mu Burundi ibiganiro bigamije gucyemura ibibazo bya politike hagati ya leta n'abarebwa n'ikibazo cy'amatora ntibyabaye.

Ibyo biganiro byari biteganyijwe kuri uyu wa kabiri ariko ishyaka riri ku butegetsi na leta ntibabyitabiriye.

Mu mitwe ya politike itavuga rumwe na leta, barega leta gushaka kujya mu matora yonyine.

Naho mu ishyaka riri ku butegetsi, bo bakavuga ko muri iki gihe ibiganiro nta kindi bigamije atari kurangaza no guta intumbero y'amatora.

Ibi biganiro byagombaga gutangira bihagarariwe n'umworoshya biganiro mushyashya wa LONI, Abdoulaye Bathily, yageze mu Burundi mu mpera z'icyumweru gishize aje gusimbura Said Djinnit.

Said Djinnit yeguye muri uwo mwanya, nyuma y'aho abatavuga rumwe na leta bamushinje kubogama.

Mandat ya gatatu

Abatavuga rumwe na leta bashaka ko umukandida w'ishyaka riri ku butegetsi, CNDD FDD, Perezida Pierre Nkurunziza, areka kwitoza muri mandat ya gatatu ngo kuko binyuranye n'itegeko nshinga ry'u Burundi.

Ariko CNDD FDD ivuga ko icyo kibazo kidashobora kwongera kuganirwaho.

Bashaka kandi ko itariki y'amatora yigizwa inyuma bakabona umwanya ukwiye wo kwiyamamaza, ariko leta ikavuga ko itariki idashobora kwongera kwigizwa inyuma.

Amatora y'abajyanama ba komine hamwe n'abadepite azaba itariko 29 z'uku kwezi, aya perezida wa republika abe itariki 15 z'ukwa karindwi.