Burundi: Amaradiyo yigenga akomeye arafunze

Image caption Inzu yakoreragamo Radiyo RPA yatewe igisasu cya rokete ku itariki ya 13 z'ukwezi kwa Gatanu 2015

Amaradiyo n'ama televiziyo atanu yigenga arafunze mu Burundi, amezi atatu nyuma y'inkubiri yo kugerageza guhirika ubutegetsi mu kwezi kwa Gatanu.

Abashatse guhirika ubutegetsi ku ngufu, bakoresheje amwe muri ayo maradiyo gutangaza umugambi wabo.

Leta y’ U Burundi yamye ivuga ko itanga ko ibyo bigo by’itangazamakuru bikomeza gukora, ariko ko hakenewe kubanza gukorwa iperereza ryerekeye uruhare aya maradiyo yagize, ndetse n’abayasahuye amwe muri yo.

Ku ruhande rw’amaradiyo ariko bavuga ko inzira ikiri ndende. Léon Masengo, yari umunyamakuru muri Bonesha FM, imwe mu maradiyo yafunzwe, ubu ni n’umuyobozi w’inzibacyuho. Yabwiye BBC Gahuzamiryango ko, ibivugwa na Leta bitandukanye n’ibigaragara mu buryo bw’ibikorwa.

Image caption Bwana Léon Masengo, umuyobozi w'agateganyo wa Radio Bonesha FM

Yagize ati: ”Ikibabaje ni uko amatohoza avuga y’uko ategezwa kuba imbere y’uko dusubira gukora bigaragara y’uko ata na kimwe cyerekana y’uko ayo matohoza yari yatangura.”

Ku kibazo cy’iperereza ry’abasahuye ayo maradiyo, Bwana Masengo yavuze ko nabyo ntaho biragera.

Yongeyeho ati: ”Nta kintu na kimwe kirakorwa”.

Yasobanuye ko bandikiye ibaruwa umukuru w’igihugu basaba kongera gutangiza ibiganiro byabo ariko ngo nta gisubizo bari babona.

Bwana Masengo avuga ko batigeze bajyana ikibazo muri Minisiteri y’Itangazamakuru kubera ko ngo bumva ko kiri ku rwego rurenze.

Bwana Masengo yanavuze ko abakozi ba Bonesha FM batazi neza ingano y’ibyononekaye kuri radiyo kubera ko babujijwe kuhagera.