Amerika yafunguye ambasade yayo muri Cuba

Uwufise ububasha kw’isanamu Getty
Image caption Minisitiri w'Ububanyi n'amahanga wa Cuba, Bruno Rodriguez (ibumoso) na John Kerry (iburyo) basezeranyije gukomeza gukorera hamwe mu gutsura umubano.

Amerika yafunguye ambasade yayo muri Cuba nyuma y’imyaka 54 ifunze, mu kimenyetso cyo gusubukura umubano w’ibihugu byombi.

John Kerry, Minisitiri w’Ububanyi n’amahanga wa mbere usuye Cuba mu myaka 70, yayoboye umuhango wabereye I Havana. Ibendera rya Amerika ryazamuwe n’abasirikare b’abamarine batatu baryururukije bwa nyuma mu mwaka wa 1961.

Perezida Barack Obama na mugenzi we wa Cuba, Raul Castro, bemeranyije kubyutsa umubano w’imigenderanire muri politike. Kuva icyo gihe Leta Zunze Ubumwe za Amerika zagabanyije amananiza y’ingendo, ariko menshi ntarakurwaho.

Cuba yafunguye ambasade yayo i Washington mu kwezi gushize kwa Karindwi.

Umunsi umwe mbere, ku wa Kane, uwahoze ari perezida wa Cuba, Fidel Castro yanditse ibaruwa igenewe abaturage, aho yavuze ko Amerika igomba Cuba amamiliyoni menshi y’amadolari kebera ikomatanyirizwa ry’ubucuruzi.

Ikomatanyirizwa ryashyizweho mu myaka 53 ishize ntiriravanwaho. Ibaruwa ya Bwana Castro ntiyavuze ku ifungurwa rya ambasade ya Amerika.

Urugendo rw’amateka

Abamarine batatu bamanuye ibendera rya Amerika bwa nyuma ku itariki ya 4 z’ukwezi kwa Mbere 1961, bongeye kurizamura mu muhango wabereye I Havana. Ubu bari mu zabukuru mu kigero cy’imyaka 70. Mu mashusho yasohowe n’ibiro bya minisiteri y’ububanyi n’amahanga, umwe muri abo ba marine, Jim Tracy, w’imyaka 78, yagize ati:

”Kubona ibendera ryongera kuzamuka biranshimisha”