Ruswa mu bucamanza bwa Ghana

Uwufise ububasha kw’isanamu Getty
Image caption Umukuru w'Urukiko rw'Ikirenga, Georgina Theodora , azayobora iperereza

Umunyamakuru ucukumbura inkuru zigoye, Anas Aremeyas, aravuga ko yarangije iperereza ryerekana uburyo abacamanza n'abakozi bo mu nkiko barya ruswa.

Yarangije gusaba umukuru w'igihugu n'umukuru w'inzego z'ubucamanza gushyiraho akanama kagomba gukurikirana abacamanza bashyirwa mu majwi.

Uwafashe aya mashusho mu gihe cy’amasaha 500, aravuga ko byamutwaye imyaka ibiri.

Hashize ibyumweru bitatu perezida w’Urukiko w’Ikirenga muri Ghana ahawe kopi y’aya mashusho.

Amasusho yerekana abacamanza bo mu rukiko rw’ibanze n’urukiko rukuru, bafata ruswa ndetse banakamura amafaranga mu bantu bafite ibirego mu nkiko.

Aya mahano arareba abacamanza cumi na babiri bo mu rukiko rukuru na makumyabiri na babiri bo mu nkiko z’ibanze.

Anas Aremeyas, umunyamakuru ukora inkuru z’icukumbura akaba n’umunyamategeko, yegereye abacamanza abaha ruswa ashaka gufunguza abaregwa.

Hari n’aho yagerageje kwigira nk’ufite ikibazo mu rukiko, igihe yatangaga ruswa.

Ejo ku wa Kane, akanama k’inteko y’ubucamanza gahana abanyamategeko baregwa kurya ruswa, kazumva abacamanza bose 34 barebwa n’aya mahano.

Ibirego byerekeye ruswa mu rwego rw’ubucamanza si bishya muri Ghana. Icyari cyarabuze ni ibimenyetso bikomeye.

Ku ba nya Ghana benshi, iri perereza rishya ni ikimenyetso gishimangira ibitecyerezo bari basanzwe bafite ku isura y’ubucamanza muri Ghana ku kibazo cya ruswa.

Umunyamakuru Anas, arateganya gutangaza aya mashusho ku mugaragaro mu nama mpuzamahanga izaba mu kwezi gutaha kwa Cumi.