Espaniya yatesheje agaciro ibirego by'ibyaha by'intambara ku basirikare 40 b'u Rwanda

Image caption Karenzi Karake-

Rushingiye ku itegeko rishya ryemejwe muri Espaniya mu mwaka ushize ku mategeko mpuzamahanga, urukiko rw'ikirenga rw'icyo gihugu rwemeje icyemezo cy'urukiko rukuru cyo gukura ibirego byo mu ntambara ku basirikare bakuru 40 b'u Rwanda.

Jordi Palou, uburanira imiryango y'abahohotewe, yabwiye BBC Gahuzamiryango ko rushingiye kuri iryo tegeko rishya "ryemejwe mu mwaka ushize", urukiko rw'ikirenga rwemeje ko Espaniya idafite ububasha bwo kurega abasirikare b'u Rwanda baregwa ibyaba by'ubwicanyi bakoze mu Rwanda no muri Congo nyuma ya jenoside yo muri 94.

Yavuze icyo cyemezo kidafitanye isano na gato no kubura ibimenyetso kuri urwo rubanza rwagajejwe mu rukiko muri 2008.

Yakomeje asobanura ko abasirikare 11, barimo Jenerali Jacques Nziza, ubu batagikurikiranywa na Esipaniya, ariko abandi 29 baregwa ibyaha by'iterabwoba" terrorisme" barimo jenerali James Kabarebe, baracyashakishwa n'icyo gihugu.

Yavuze ko bishoboka ko abo basirikare 29 "bashobora gufatwa hakoreshejwe inzandiko zo gufata z'ibihugu by'burayi kubera ko baregwa iterabwoba."Urubanza rurabategereje kugeza igihe bazagezwa imbere n'ubucamanza."

Jodi Palou yatanze amazina y'abasirikare 11 batagikurikiranywa ko ari: Jacques Nziza, Sam Kanyemera, Twagira Dodo, Karara Bisingo, Alphonce Kaje, Frank Bakunzi, Dan Gapyisi, John Butera, Kapiteni Matayo, Petero Kalimba na John Bagabo.

Gahuzamiryango yagerageje kuvugana n'abategetsi b'u Rwanda ntibyashoboka ariko amakuru yanditswe ku rubuga Igihe.com aravuga ko giverinoma y'u Rwanda" yatangaje ko yakiriye neza umwanzuro w'urukiko rw'ikirenga muri Esipanye."

Izo manza zagejejwe mu rukiko muri Espaniya n'umucamanza Andreu Merelles muri 2008