LONI ishobora kohereza ingabo mu Burundi

Uwufise ububasha kw’isanamu AP
Image caption Akanama k'Umutekano muri LONI kanenze bikeomeye abategetsi mu Burundi.

Akanama k’Umutekano muri LONI kemeje ku bwiganze bw’amajwi icyemezo kinenga cyane izamuka ry’imyivumbagatanyo y’urugomo mu Burundi.

Icyemezo cya LONI kiraharurira inzira gukomeza ijisho mpuzamahanga ku Burundi, ndetse bigashoboka ko hanakoherezwa ingabo zirinda amahoro.

Kuri izo ngamba, abategetsi basshishikariza urugomo cyangwa bakabangamira umuhate w’amahoro bashobora guhabwa ibihano. Mbere gato, LONI, Umuryango w’ubumwe bw’Uburayi n’Umuryango w’Ubumwe bwa Afurika byahasabye guverinoma y’Uburundi n’abatavuga rumwe na Leta kwitabira ibiganiro birimo ubuhuza mpuzamahanga bigamije kurangiza imvururu.

Imvururu zatewe n’icyemezo cya perezida Pierre Nkurunziza cyo kwiyamamaza ku nshuro ya gatatu.

"Nta honyabwoko mu Burundi"

Mu muhango w'amasengesho yo gusabira Uburundi ejo hashize, ku wa Gatatu tariki ya 11 z'uku kwezi kwa Cumi, Perezida Pierre Nkuruziza yavuze ko ibintu bivugwa atari ko bimeze mu gihugu kandi arahira ko imyivumbagatanyo n'imvururu biri mu Burundi 'bidashobora' gutera jenoside.

yagize ati:

“Mpagaze ngaha imbere y’Abarundi bose n’amahanga bashobora kubyumva batobyumva, turemesha isi yose ko ata honyabwoko rizoba mu Burundi.”

Perezida Nkurunziza yahumurije Abarundi avuga ko ngo igihe cyose “turi kumwe n’Imana” nta kibi kizaba. Yamaganye abo avuga ko bacurera umuvumo ku Burundi. Avuga ko igihe Uburundi bugezemo bukwiye kuzirikana neza ubumwe.

Umuryango International Crisis Group uherutse kuvuga ko imvugo ikoreshwa n’abategetsi mu Burundi isa n’iyakoreshejwe mu gihe cya jenoside mu Rwanda mu 1994.

Aho abategetsi bahembera ubwicanyi n’urwango.

Perezida Paul Kagame w’u Rwanda aherutse kunenga bikomeye ubutegetsi mu Burundi avuga ko “bwica” abaturage.

Amagambo ya perezida Kagame yakiriwe nabi cyane n’abategetsi mu Burundi bavuga ko adakwiye kuvugwa n’umutegetsi.

Umuryango w'Abibumbye uvuga ko abantu bagera kuri 200 bamaze kwicwa mu Burundi kuva mu kwezi kwa Kane 2015.