Tanzaniya: Abakora mu birombe batunzwe "n'udusimba duto"

Uwufise ububasha kw’isanamu Issa Michuzi
Image caption Biravugwa ko abakora mu birombe batabawe bananiwe cyane

Abakozi 5 bakora mu birombe by’amabuye y’agaciro batabawe mu burengerazuba bwa Tanzaniya nyuma yo guhera munsi y’ubutaka mu gihe cy’iminsi 41.

Polisi iravuga ko abandi 12 baraboneka. Aba bagabo barokowe no kurya imizi y’ibiti, ubutaka, ibicyeri ndetse n’inyenzi none ubu bari kuvurirwa ku bitaro.

Polisi ivuga ko aba iri tsinda ry’abagabo ryari ryagiye munsi y’ubutaka gutabara abandi 11 bacukura amabuye y’agaciro, bakaza guheramo.

Abantu benshi bashakisha zahabu mu buryo budakurikije amategeko mu bice by’itaruye bya Tanzaniya, bizera kuba abakire.

Iki ni cyo gihe kirekire kibayeho, abacukura amabuye y’agaciro baheze munsi y’ubutaka. Muri Shili (Chile), 33 batabawe nyuma y’iminsi 69 mu mwaka wa 2010 mu gikorwa cyangaje isi yose.

Uwufise ububasha kw’isanamu Issa Michuzi
Image caption Abakozi bo mu birombe baturuka mu miryango ikennye

Umunyamakuru wa BBC, Alice Muthengi, uri mu mujyi wa Da es Salaam aravuga ko umuhate w’ibikorwa by’abaturage byo gutabara abacukuzi b’amabuye y’agaciro muri Tanzaniya byahagaritswe mu kwezi gushize nyuma y’igihe kigera ku cyumweru icyizere cyo kubabona kimaze kuyoyoka.

Ariko umuborogo wabo wacyebuye abandi bacukuzi b’amabuye bakorera hafi aho, bamenya ko iryo tsinda ryari ryaraheze munsi y’ubutaka, ibikorwa byo kubashaka birongera biratangira bwangu mu mujyi wa Shinyanga mu majyaruguru y’uburengerazuba, nko mu bilometero 900 (km 900) uvuye mu burengerazuba bwa Dar es Salaam.

Umuyobozi wa polisi mu Karere ka Kahama, Justus Kamugisha, yabwiye BBC ko abacukuzi b’amabuye y’agaciro 11 bari baheze munsi y’ubutaka, na mugenzi wabo wari wagiye kubashaka baracyaburiwe irengero, bikanacyekwa ko bapfuye.

Uwufise ububasha kw’isanamu Issa Michuzi
Image caption Bavuga ko amabuye y'amatoroshi yabo yashize bari munsi y'ubutaka

Ibiro ntaramakuru AFP, biravuga ko Minisiteri ishinzwe amabuye y’agaciro yatangaje ko abacukuzi b’amabuye y’agaciro batabawe, bari baheze munsi y’ubutaka mu bujyakuzimu bwa metero nk’ijana (m 100) igihe ikirombe cyaridukaga.

Umuvugizi wa minisitiri w’ingufu na mine, Badra Masoud, yagize ati :”Abacukuzi b’amabuye y’agaciro bari bananiwe cyane.”

Uwatabawe, Chacha Wambura, yabwiye televiziyo ya leta ati:

”Twarokowe no kurya inyenzi, ibicyeri ndetse n’utundi dusimba duto no kunywa amazi mabi ava hejuru y’ubutaka.”

AFP ivuga ko yongeyeho ati:

“Amabuye y’amatoroshi yarashize twisanga mu kuzimu twari dusanzwe dukoresha nk’ububiko bw’ibikoresho byacu.”