Mali: Ingabo ziri guhiga abateye hoteli

Uwufise ububasha kw’isanamu AFP

Inzego z’umutekano muri Mali ziri guhiga abarashi batatu bacyekwaho kugira isano n’igitero cyagabwe kuri hoteli mu murwa mukuru, Bamako, ku wa Gatanu kikica abantu 19.

Abarashi babiri nabo barishwe nyuma y’uko ingabo kabuhariwe zinjiriye muri hoteli zibohora abashyitsi babarirwa muri mirongo bari bafashwe bugwate.

Umuyobozi umwe mu bitaro bikuru bya Bamako yabwiye BBC ko imirambo 21 yajyanywe mu nzu y’uburuhukiro bw’ibitaro.

Al-Qaeda ndetse n’umutwe wa kiyisilamu wa al-Murabitoun uyishamikiyeho muri Maghreb byavuze ko byagabye icyo gitero.

Perezida Ibrahim Boubacar Keita yatangaje iminsi 10 y’amategeko adasanzwe n’iminsi itatu y’icyunamo.

Abakozi n’abantu barenga 130 bari bacumbitse muri hoteli babohowe igihe ingabo kabuhariwe za Mali, ingabo zidasanzwe z’ubufaransa ndetse n’abasirikare bavuye ku rugerero bo muri Leta Zunze Ubumwe za Amerika bigabaga muri hoteli Radisson Blu ku wa Gatanu bakarangiza ifatwa bugwate.

Uwufise ububasha kw’isanamu AFP

Ibiro ntaramakuru Reuters byavuze ko mu bishwe hari harimo n’abanyemari b’Abashinwa, kandi perezida w’Ubushinwa, Xi Jinping yise iki gitero ko ari “ubugome n’ubunyamaswa”.

Umunyamerika nawe yishwe, perezida Barack Obama yavuze ko iki gitero ari urundi rwibutso ko icyorezo cy’iterabwoba cyugarije ibihugu byinshi.

Minisitiri w’Ububanyi n’amahanga w’Ubwongereza Philip Hammond yavuze ko Abongereza batatu ntacyo babaye. Perezida Keita yavuze ko Mali “izakora ibishoboka byose mu kirandura iterabwoba” mu gihugu.

Mbere gato hari amakuru yavugaga ko abantu bagera kuri 27 bapfuye.

Umukozi wa LONI, wasabye kudatangazwa amazina, yavuze ko imirambo 12 yabonywe mu cyumba cyo hasi indi 15 iboneka mu igorofa rya kabiri.

Uwufise ububasha kw’isanamu EPA
Image caption Bamwe mu batabawe bari bakomeretse

Ntibisobanutse neza umubare w’abarwanyi bagize uruhare muri iki gitero. Abatangabuhamya bavuga ko abantu bagera kuri 13 binjiye muri hoteli barasa, banasakuza ngo “Imana ni nkuru!” mu Cyarabu. Cyakora ku wa Gatanu kompanyi Rezidor Group, ny’iri hoteli yatewe, yavuze ko abantu babiri ari bo bagize uruhare.

Umunyamakuru wa BBC, Frank Gardner, mu rwego rw’umutekano, avuga ko kwigamba kw’umutwe w’abarwanyi ba jihadi ushamikiye kuri al-Qaeda muri Sahara ari urwibutso ko igihugu kigihanganye n’ibitero by’abarwanyi.

Uwufise ububasha kw’isanamu AFP

Muri 2013, ingabo z’Ubufaransa zashoboye kubohoza ibice binini byari byarafashwe n’imitwe y’abarwanyi muri Mali.

Ariko umunyamakuru wacu avuga ko Mali ari igihugu kinini cyane kandi gifite imwe mu mipaka itarindwa byoroshye kuyicamo ikagira n’ubutaka butayoborwa aho abarwanyi ba jihadi bashoboye kwihisha bakagaba ibitero.

Ariko kandi Mali ntiyanafashijwe no kuba byoroshye cyane kwinjiza intwaro mu gihugu zivuye muri Libiya cyangwa ibitero by’ubwicanyi hafi y’abaturanyi muri Nijeriya. Nta sano rirashyirwa kuri iki gitero no ku bitero by’I Paris byishe abantu 130 mu cyumweru gishize.

Uwufise ububasha kw’isanamu AFP

Abishwe

  • Geoffrey Dieudonne, umukozi mu nteko ishinga amategeko y’Ububiligi mu gace ka Wallonia
  • Abashinwa batatu- Zhou Tianxiang, Wang Xuanshang na Chang Xuehui bari abayobozi ba kompanyi y’Ubushinwa y’ubwubatsi bwa gari ya moshi. Nk’uko byavuzwe n’itangazo ry’iyi kompanyi ku rubuga rwayo rwa interineti.
  • Umunyamerika Anita Datar w’imyaka 41, yari ari muri Mali akora mu mushinga ureba ibyo kuboneza imbyaro no kurwanya ubwandu bw’agakoko ka HIV
  • Umuvugizi wa minisiteri y’ububanyi n’amahanga mu Burusiya, Maria Zakharova, yabwiye ibiro ntaramakuru by’Uburusiya ko Abarusiya benshi nabo barishwe.

Imitwe y’abarwanyi muri Mali

  • Ukwezi kwa Cumi 2011: Abo mu bwoko bw’aba Tuareg batangije intambara y’ubunyenshyamba nyuma yo kuva muri Libiya bazanye intwaro.
  • Ukwa Gatatu 2013: Ihirika ry’ubutegsti ryakozwe n’igisirikare kebera ukutu guverinoma yafashe inyeshyamba, nyuma y’ukwezi aba Tuareg bisunze kuri al Qaeda bafashe agace k’amajyaruguru
  • Ukwa Gatandaru 2012: imitwe ya kiyisilamu yafashe Timbuktu, Kidal na Gao ziyambura aba Tuareg, itangira gusenya ahantu hatagatifu ku idini ya isilamu, batwika inyandiko za cyera banategekesha shariya
  • Ukwa Mbere 2013: Abarwanyi ba kiyisilamu bafashe umujyi mukuru bitera ubwoba ko bashobora kugera I Bamako. Mali isaba ubufasha bw’Ubufaransa.
  • Ukwa Karindwi 2013: Ingabo za LONI, ubu zibarirwa hafi ku 12.000 zafashe ubugenzuzi bw’umutekano mu majyaruguru nyuma y’uko abarwanyi ba kiyisilamu bazibukiriye bava mu mijyi.
  • Ukwa Karindwi 2014: Ubufaransa bwagabye igitero muri Sahel cyo gutsimbura imitwe ya jihadiIbitero byitirirwa aba Tuareg n’imitwe ya kiyisilamu, birakomeza mu gace k’ubutayu mu majyaruguru.
  • 2015: Ibitero by’iterabwoba mu murwa mukuru, Bamako no hagati muri Mali.

Ibindi kuri iyi nkuru